Toshkent viloyatida jami 891 ta maktab faoliyat ko‘rsatayotgan bo‘lib, hozirgi kunda 54 ta umumta’lim maktabi karantin holatida. Shu kunga qadar tahsilni onlayn rejimida olib borgan ushbu maktablarda imtihon jarayonlari qoldirilgan. Bu haqda viloyat hokimligi matbuot xizmati xabar berdi.
Ma’lum qilinishicha, 26-may kunidan boshlangan 9 va 11- sinflarda o‘tkaziladigan davlat imtihonlari 837 ta maktabda barqaror holatda davom etmoqda.
Tahsilni onlayn olib borgan ta’lim muassasalarida esa karantin muddati tugagach, navbatdan tashqari pedagogik kengash yig‘ilishi o‘tkazilib, imtihon kunlari (sanalari) belgilab olinadi va belgilangan sanalarda karantin qoidalariga qat’iy rioya qilgan holda ochiq havoda yoki yopiq binolarda o‘tkaziladi.
Avvalroq Samarqand shahridagi barcha ta’lim muassasalari 26-maydan an’anaviy ta’limga qaytgani to‘g‘risida xabar berilgandi.
Ma’lumot uchun, epidemiologik holat og‘irlashgan hududlarda mahalliy hokimlik organlariga karantin talablarini kuchaytirish choralarini ko‘rish vakolati berilgan. Shuni inobatga olib, hududiy hokimliklar ba’zi tumanlardagi maktablarni to‘liq masofaviy ta’lim shakliga o‘tkazish bo‘yicha qaror qabul qilishi mumkin.
Izoh (0)