J-United Group «Ашхобод» сайилгоҳи ташриф буюрувчиларига етказилган зарарни қоплаши керак

J-United Group рекламасидаги нотўғри маълумотлар туфайли «Ашхобод» боғига ташриф буюрувчиларга товон пулини тўлаши керак. Бу ҳақда Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги хабар берди.

Агентликнинг маълумотларига кўра, 2020 йилнинг декабрь ойида «Ашхобод» сайилгоҳи фаолияти бўйича, яъни рекламада ваъда қилинган шартлар Янги йил байрами (2020 йилнинг 25–27 декабрь) кунларида таъминланмаганлиги тўғрисида «Potrebitel.uz» гуруҳида истеъмолчининг шикояти қолдирилган.

Агентлик истеъмолчиларнинг номуайян доираси ҳуқуқлари ва манфаатларини ҳимоя қилиш мақсадида ушбу масалани ўрганиб чиқди. Ўрганишларда сайилгоҳга ташриф буюрувчиларни чалғитувчи нотўғри ва ноаниқ маълумотларни реклама баннерида жойлаштиргани, оқибатда сайилгоҳ томонидан истеъмолчилар ҳуқуқлари ва реклама тўғрисидаги амалдаги қонунчилик нормалари бузилгани маълум бўлди.

«Истеъмолчиларнинг ҳуқуқларини ҳимоя қилиш тўғрисида»ги қонунга мувофиқ (6-моддаси) ижрочи истеъмолчига ўзи реализация қилаётган иш ва хизматлар ҳақида ўз вақтида зарур, тўғри ва тушунарли маълумот бериши шарт.

Агентлик комиссиясининг қарори асосида ва қонун ҳужжатларига мувофиқ J-United Group МЧЖ ижтимоий тармоқ пости муаллифига, шунингдек, 2020 йилнинг 25—27 декабрь кунлари нотўғри реклама олган бошқа истеъмолчиларга ҳам пул маблағлари кўринишидаги етказилган моддий зарар (фақат кириш учун) қайтарилишини таъминлаши бўйича кўрсатма берилди.

Шундан сўнг истироҳат боғи маъмурияти қарор ва чиқарилган буйруққа рози бўлмаган ҳолда судга мурожаат қилди. 17 май куни Тошкент туманлараро маъмурий судида мазкур ишни кўриб чиқиш натижалари бўйича агентлик томонидан қабул қилинган қарорни ўз кучида қолдириш ва J-United Group МЧЖга чиқарилган кўрсатмани ижро этиш тўғрисида қарор қабул қилинди.

Корхоналар ва ташкилотларнинг ягона давлат реестри маълумотларига кўра, 2002 йил август ойида рўйхатдан ўтган Ж-United Group компаниясининг ягона асосчиси Тошкент шаҳри ҳокими Жаҳонгир Ортиқхўжаев ҳисобланади.

Бундан аввал Тошкентдаги Central Park ташриф буюрувчиларга 335 миллион сўмдан ортиқ пулни қайтариб бериши ҳақида хабар берилганди.