«Манчестер Юнайтед» Испаниянинг еттинчи жамоаси «Вильярреал»га қарши ўйнайди. Испан клубини Европа Лигасини ютиш «ҳадисини олган» Унаи Эмери бошқариб бормоқда. Жамоалар шу кунга қадар расмий ўйинларда тўрт бор тўқнаш келган бўлса, уларнинг барчасида 0:0 ҳисобидаги нурсиз дуранг қайд этилган. Бироқ бу Гданскдаги финал зерикарли ўтишини англатмайди, сабаби юқоридаги тўрт ўйин бундан 12—15 йиллар олдин ўтказилган. Инглизларнинг кучли ҳужум чизиғи испанларнинг тартибли ҳимоясини ёриб ўтишга ҳаракат қилади.
Европа Лигаси
Финал баҳси
«Вильярреал» (Испания) — «Манчестер Юнайтед» (Англия)
26/27 май, 00:00Гданск, Польша
Жамоалар босиб ўтган йўл
«Вильярреал»нинг Европа Лигасининг кўрсаткичлари жуда юқори даражада: 12 ғалаба ва икки дуранг! Унаи Эмери жамоаси гуруҳ босқичидаёқ ўз устунлигини намойиш қила олди. «Сариқ сув ости кемаси» «Сивасспор» ва «Қорабоғ»ни икки ўйинда ҳам мағлуб этди, «Маккаби Тель-Авив» қарши учрашувда биттадан ғалаба ва дуранг қайд этди. Тўпланган 16 очко орқали гуруҳда биринчи ўрин билан плей-оффга йўлланма олди. 1/16 финалда испан клуби «Зальцбург»ни икки ўйинда ҳам таслим этди (2:0, 2:1). Кейинчалик «Динамо Киев» (2:0, 2:0) ва «Динамо Загреб» (1:0, 2:1) ортда қолдирилди. Ярим финалда Эмери собиқ жамоаси «Арсенал»ни доғда қолдирди (2:1, 0:0).«Манчестер Юнайтед»нинг йўли Чемпионлар Лигасида бошланди. Инглиз клуби гуруҳ босқичида «ПСЖ», «Лейпциг» ва «Истанбул Башакшеҳир» билан баҳс юритди ва учинчи ўринни олиб, Европа Лигасига тушди. Европа Лигасида Оле-Гуннар Сульшер шогирдлари испан ва итальян жамоаларига қарши ўйнади. Аввалига «Реал Сосьедад»ни тўсиғидан (4:0, 0:0) ўтган жамоа кейинги босқичда «Милан»ни ортда қолдирди (1:1, 1:0). Шундан кейин «Юнайтед» «Гранада»ни муаммосиз енгди (2:0, 2:0) ва ярим финалда «Рома»га имкон қолдирмади (6:2, 2:3).
«Вильярреал»
Европа Лигасида «Вильярреал» ҳимоясини ёриб ўтиш осон бўлмаяпти
Мусобақада испан клубининг сўнгги тўртта рақиби иккита ўйиндан иборат тўқнашувда биттадан ортиқ гол ура олмади. «Вильярреал» тўртта ҳимоячи билан ўйнаб келмоқда ва улар таркибида ҳақиқатда яхши футболчилардан иборат. Рауль Альбиоль ортиқча таърифга муҳтож эмас: ҳимоячи 35 ёш бўлишига қарамай ҳамон юқори савия қайд этмоқда. Альбиоль билан жуфтликда ортда қолган мавсум кашфиётига айланган Пау Торрес ўйнайди. 24 ёшли футболчи трансфер бозорида харидоргир «маҳсулот» бўлиб турибди. Унга даъвогарлар қаторида айнан «Манчестер Юнайтед» ҳам бор.«Вильярреал» қаноти ҳам кучли ўйинчилардан иборат, иккиси ҳам клуб тизимидан чиққан. Марио Гаспар — жамоанинг етакчиси ва сардори, Алфонсо Педраса эса ёзги трансфер ойнасида жамоани тарк этиши кутилаётган яна бир иқтидор эгаси. Хабарларга кўра, футболчига «Барселона»дан қизиқиш бор, бироқ ҳозирнинг унинг учун энг муҳим Европа Лигасида ғолиб чиқиш. Шундай экан «Манчестер Юнайтед» ҳужумчилари бу ўйинда рақиб дарвозасига йўл топиш учун анча-мунча тер тўкишига тўғри келади.
Европа Лигаси ғолиблиги — Чемпионлар Лигаси йўлланмасига эга чиқиш учун сўнгги имкон
«Вильярреал» Ла Лигада еттинчи ўринни олди ва янги ташкил этилган Конференциялар Лигасига йўлланма олди. УЕФАнинг янги мусобақаси топ-5 лига клубларини қизиқтириши эҳтимоли кам. Шу сабаб Европа Лигаси финалида бор кучни ташлашдан ўзга чора йўқ. Жамоа ортда қолган мавсумдаги ўйинидан келиб чиқиладиган бўлса, камида Европа Лигасига муносиб эди: «Вильярреал» кўп ўйинларда яхши ҳаракат қилиб, очко йўқотди. Шунингдек, Эмери шогирдлари урилган голлар борасида фақат «Барселона» ва Мадрид жамоаларидан ортда қолди.Яна Эмерининг Европа Лигаси бўйича ҳақида мутахассис эканини унутмаслик лозим. Эмери «Севилья» билан уч бор ушбу совринга эга чиққан, «Арсенал» билан эса финалга қадар етиб келганди.
«Манчестер Юнайтед»
«Манчестер Юнайтед» яхши формада эмас
«Қизил иблислар» сўнгги олтита ўйинда бор-йўғи иккита ғалаба қайд этди, шу билан бирга учта ўйинни бой берди. Албатта, буни мақсад йўқлиги ва мотивация билан боғлаш мумкин: «Рома»га қарши мағлубият тўртта тўп фарқи билан зафар қучилган ўйиндан кейин бўлди, «Лестер»га қарши баҳсда эса иккинчи таркиб майдонга тушди. Бироқ принципиал рақиб бўлган «Ливерпуль»га қарши ўйин асосий таркиб билан бой берилди. «Фулҳэм»га қарши ўйиндаги 1:1 ҳисобини тушунтириш қийин. Эдинсон Кавани майдон марказидан жуда чиройли гол урди, бироқ аутсайдер «Олд Траффорд»дан очко олиб қайтди. Бундай хотиржамлик мавсумнинг сўнгги ўйинида ҳам панд бериб қўйиши мумкин
«Манчестер Юнайтед» ўйинга тайёргарлик кўриш учун етарли вақтга эга бўлди — Премьер Лиганинг сўнгги турида «Вулверҳэмптон»га қарши ўйинда захира ўйинчиларини ташлади, захирадан тушган ўйинчиларини ҳатто «Манчестер Юнайтед»нинг мухлислари ҳам таниши мушкул масала. Қўшимча ҳордиқ кунлари инглиз клубининг тикланиш жараёнига ижобий таъсир ўтказиши мумкин, «Вильярреал» эса шанба куни ўйин ўтказди, бироқ бу ҳал қилувчи аҳамиятга эга деб бўлмайди.
Ҳарри Магуайрнинг иштироки сўроқ остида
«Манчестер Юнайтед» сардори жамоанинг сўнгги ўйинини май ойи бошида ўтказганди. «Астон Вилла»га қарши ўйиннинг 78-дақиқасида футболчи жароҳат туфайли захирага олинганди ва шундан бери майдонга тушгани йўқ. Ҳарри Гданскка жамоа билан бирга келган. Сульшер журналистларнинг футболчи ҳолати билан боғлиқ саволига тўғридан-тўғри жавоб беришдан қочди ва якуний қарор машғулотлардан кейин чиқарилишини маълум қилди.Агар Англия терма жамоаси вакили ўйинда қатнаша олмайдиган бўлса, унинг ўрнини катта эҳтимол билан Аксел Туанзебе эгаллайди. 23 ёшли футболчи мавсум давомида у қадар кўп ўйин амалиётга эга бўлмади, бироқ унинг майдонга тушиши «биллур оёқ» Эрик Байиникидан кўра ҳақиқатга яқинроқ.
Тахминий таркиблар
«Вильярреал»: Рули, Педраса, Торрес, Альбиоль, Гаспар, Капу, Парехо, Гомес, Тригерос, Бакка, Морено.
«Манчестер Юнайтед»: Де Хеа, Шоу, Линдельоф, Туанзебе, Уан-Биссака, Фред, Мактоминай, Погба, Рэшфорд, Бруну Фернандеш, Кавани.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)