Samarqandda YPX xodimidan qochib, unga qarshilik ko‘rsatgan haydovchiga nisbatan ish ochildi

Samarqand viloyati Toyloq tumanida profilaktika inspektoriga bo‘ysunmagan haydovchi qo‘lga tushdi, deya xabar bermoqda viloyat IIB.

Ma’lum qilinishicha, 2021-yilning 20-may kuni soat 20:00 lar atrofida Toyloq tumanning “Charog‘bon” mahallasi hududidan o‘tuvchi yo‘lda oq rangli, davlat raqam belgisiz Lacetti rusumli avtomashina qarama-qarshi yo‘nalishda harakatlanib kelgan.

Haydovchining harakatlari mazkur hududda xizmat olib borayotgan profilaktika inspektori A.Tursunovda shubha uyg‘otganligi sababli mashina egasiga to‘xtash ishorasini berilib, undan tegishli hujjatlar so‘ralganida, haydovchi xodimning qonuniy talabini bajarmasdan, avtomashinani ortga burib qochib ketgan.

Profilaktika inspektori holat yuzasidan tuman IIB boshlig‘i nomiga bildirgi bilan murojaat qilgan.

Olib borilgan surishtiruvlar davomida ushbu fuqaro Toyloq tumani “Navbahor” mahallasida yashovchi, 1994-yilda tug‘ilgan P.J. ekanligi aniqlanib, unga tuman IIBga borish taklif qilinganida, fuqaro xodimlarga faol qarshilik ko‘rsatgan.

Profilaktika inspektori tomonidan evakuator chaqirtirilib, fuqaroning avtomashinasi vaqtinchalik saqlash uchun jarima maydoniga yuborilgan.

Fuqaro P.J.ga nisbatan Ma’muriy javobgarlik to‘g‘risidagi kodeksning 194 (ichki ishlar organlari xodimining qonuniy talablarini bajarmaslik) va 195-moddalariga (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) asosan ma’muriy bayonnomalar rasmiylashtirilib, to‘plangan hujjatlarni Jinoyat ishlari bo‘yicha Toyloq tuman sudiga yuborish choralari ko‘rilmoqda.

Bundan avval Bo‘stonliqda Toshkent shahar IIBB xodimi ishtirokida YTH yuz bergani, Surxondaryoda haydovchi “Jiguli”da 16 nafar fuqaroni olib ketayotgani aniqlangani hamda buxorolik haydovchi qarzdorligini yashirish maqsadida mashinasining raqamini o‘zgartirgani ma’lum bo‘lgani haqida xabar berilgandi.