Samarqand shahridagi barcha ta’lim muassasalarida o‘qish an’anaviy ta’lim shakliga qaytadi, deya xabar bermoqda shahar hokimligi axborot xizmati rahbari Abdujabbor Po‘latov.
Samarqand shahri hokimligi huzuridagi Epidemiyaga qarshi kurash favqulodda komissiyasining qarori asosida shahardagi barcha ta’lim muassasalari 2021-yilning 10-may kunidan 25-may kuniga qadar qayta karantinga olingani va ta’lim berish tizimi onlayn yo‘lga qo‘yilgani haqida xabar berilgandi.
Komissiyaning tasdiqlangan navbatdagi qaroriga ko‘ra, Samarqand shahridagi epidemiologik holat bir muncha barqarorlashganini inobatga olib, sanitariya-epidemiologik va karantin qoidalari va me’yorlariga qat’iy rioya qilgan holda 26-may kunidan boshlab shahardagi umumta’lim maktablarida imtihonlar an’anaviy tarzda olib borilishiga ruxsat berildi.
Shuningdek, yopiq sport inshootlari ish faoliyatini boshlash akademik litsey, texnikum va kasb-hunar kollejlari hamda oliy ta’lim muassasalarida dars jarayonlarini an’anaviy shaklda o‘tkazish ham mumkin.
Shu bilan birga, 2021-yilning 1-iyun kunidan boshlab maktabgacha ta’lim tashkilotlari ham ish faoliyatlarini karantin talablariga rioya qilgan holda davom ettirishi mumkin.
Keyingi o‘rinlarda ham infeksiya aniqlangan har bir holat bo‘yicha mas’ullar tomonidan chuqur epidemiolog surishtiruv o‘tkazilib, belgilangan talablardan kelib chiqqan holda, kasallik aniqlangan MTMlarni ish faoliyatini to‘xtatish, akademik litsey texnikum va kasb-hunar kollejlari hamda OTM guruhlar, bo‘lim va fakultetlar tizimida dars jarayonlari onlayn shaklga o‘tkazish mumkinligi ko‘zda tutilgan.
Bundan avval TATUda o‘qish jarayonlari o‘quv yilining oxirigacha onlayn shaklda qoldirilgani, Namangan davlat universiteti karantinga yopilgani hamda Toshkent davlat yuridik universiteti ham 14 kunga masofaviy ta’limga o‘tgani haqida xabar berilgandi.
Izoh (0)