Toshkent shahar hokimi Jahongir Ortiqxo‘jayev 25-may, seshanba kuni “Toshkent 5 tashabbus harakati” yoshlar festivali doirasida o‘tkazilgan uchrashuvda yigit-qizlarga sharoit yaratib berish masalasida so‘z yuritdi. Bu haqda “Daryo” muxbiri xabar bermoqda.
“Tataristonga borganimda bir narsaga guvoh bo‘ldimki, u yerlarda katta-katta muzeylar, istirohat bog‘larida yosh-yosh kadrlar rahbar ekan. U yerda ishga, tajribaga qarab lavozimni taqsimlab berishmas ekan. Tanlovlar o‘tkazib, kadrlar saralab olinarkan. Bu model menga juda ma’qul bo‘ldi.
Bugun hokimlikda o‘tkazilgan yig‘ilishda shahrimizdagi teatr, maydon, bog‘lar, muzeylar, madaniyat saroylarini qayta rekonstruksiya va jozibador qilish, yoshlarga sharoit yaratish, IT mutaxassisi bo‘lgan yigit-qizlar uchun ijara emas, mutlaqo tekin joylar, kovorking markazlarini yaratish masalasini ko‘rib chiqdik.
Yaqinda bir model o‘ylab chiqdik. Unga ko‘ra, hokimlik ishchilari hokimlik binosida o‘tirishini noto‘g‘ri, deb hisoblaymiz. To‘g‘risini aytsam, o‘zim ham katta bir angar ichida o‘tirishni xohlayapman. U yoshlar, umuman, hammaning kirib chiqishi oson bo‘lgan joy bo‘lishi kerak”, — dedi Ortiqxo‘jayev.
Izoh (0)