Самарқанд шаҳридаги барча таълим муассасаларида ўқиш анъанавий таълим шаклига қайтади, дея хабар бермоқда шаҳар ҳокимлиги ахборот хизмати раҳбари Абдужаббор Пўлатов.
Самарқанд шаҳри ҳокимлиги ҳузуридаги Эпидемияга қарши кураш фавқулодда комиссиясининг қарори асосида шаҳардаги барча таълим муассасалари 2021 йилнинг 10 май кунидан 25 май кунига қадар қайта карантинга олингани ва таълим бериш тизими онлайн йўлга қўйилгани ҳақида хабар берилганди.
Комиссиянинг тасдиқланган навбатдаги қарорига кўра, Самарқанд шаҳридаги эпидемиологик ҳолат бир мунча барқарорлашганини инобатга олиб, санитария-эпидемиологик ва карантин қоидалари ва меъёрларига қатъий риоя қилган ҳолда 26 май кунидан бошлаб шаҳардаги умумтаълим мактабларида имтиҳонлар анъанавий тарзда олиб борилишига рухсат берилди.
Шунингдек, ёпиқ спорт иншоотлари иш фаолиятини бошлаш академик лицей, техникум ва касб-ҳунар коллежлари ҳамда олий таълим муассасаларида дарс жараёнларини анъанавий шаклда ўтказиш ҳам мумкин.
Шу билан бирга, 2021 йилнинг 1 июнь кунидан бошлаб мактабгача таълим ташкилотлари ҳам иш фаолиятларини карантин талабларига риоя қилган ҳолда давом эттириши мумкин.
Кейинги ўринларда ҳам инфекция аниқланган ҳар бир ҳолат бўйича масъуллар томонидан чуқур эпидемиолог суриштирув ўтказилиб, белгиланган талаблардан келиб чиққан ҳолда, касаллик аниқланган МТМларни иш фаолиятини тўхтатиш, академик лицей техникум ва касб-ҳунар коллежлари ҳамда ОТМ гуруҳлар, бўлим ва факультетлар тизимида дарс жараёнлари онлайн шаклга ўтказиш мумкинлиги кўзда тутилган.
Бундан аввал ТАТУда ўқиш жараёнлари ўқув йилининг охиригача онлайн шаклда қолдирилгани, Наманган давлат университети карантинга ёпилгани ҳамда Тошкент давлат юридик университети ҳам 14 кунга масофавий таълимга ўтгани ҳақида хабар берилганди.
Изоҳ (0)