Toshkent shahrida 23-may kuni soat taxminan 19:35 dan so‘ng kuchli yog‘ingarchilik (jala) kuzatilishi oqibatida ko‘chalarni suv bosgani to‘g‘risida xabar berilgandi. Poytaxt hokimligi bu kabi noqulayliklar nima sababdan yuzaga kelayotganiga oydinlik kiritdi.
Ma’lum qilinishicha, Toshkentga xizmat ko‘rsatuvchi kommunal xizmat xodimlari va texnika ta’minotida avvalgi yillarga qaraganda ancha o‘sish bor. Avariyaviy vaziyatlarda foydalanish uchun maxsus mashinalar xarid qilingan, ishchilar soni ortgan. Biroq shunga qaramay, yog‘ingarchilik vaqtida yo‘llarga suv toshishi kabi muammolar kuzatilmoqda.
Obodonlashtirish boshqarmasi xodimi Xayrulla Tursunovning so‘zlariga ko‘ra, poytaxtda yog‘gan yomg‘ir natijasida ko‘plab markaziy va ichki ko‘chalar suv to‘planishidan aziyat chekadi.
“Biz soat 19:00 dan ish boshladik va sal kam 3 soat mobaynida Mirobod tumanining markaziy va ichki ko‘chalarini yomg‘ir suvlaridan tozaladik. Aslida, har kuni bu ko‘chalarni va ariqlarni tozalaymiz, supuramiz. Biroq ertasi kuni xuddi ish qilinmagandek, yana shu ahvol! Savol berishingiz mumkin, nega har kuni ariqlar tozalansa ham, suv oqib ketmayapti, deb.
Kecha tozalagan ariqlarimizning barchasini polietilen paketlar, bir marotabalik qog‘oz stakanlar va baklajkalar to‘sib qo‘ygan va suv oqib ketishiga imkon bo‘lmagan. Ayniqsa, polietilen paketlar — barcha muammolarning sababchisi. Ariqlarning zovurlarga quyiladigan qismida temir panjaralar o‘rnatilgan, o‘sha yerni tozalab tashlasak, muammo hal. Biroq unga qadar vaqt kerak bo‘ladi va yo‘llarga suv toshadi”, — deydi Tursunov.
Toshkent shahar hokimining uy-joy kommunal masalalari bo‘yicha o‘rinbosari vazifasini bajaruvchi Shoxruh Rahimjonovning aytishicha, 23-may kuni xodimlar soat 19:00 dan 01:30 ga qadar tinmay ishlagan, 300 nafar obodonlashtirish xodimlari yog‘ayotgan yomg‘ir ostida xizmat qilgan. Shuningdek, 20 tadan ortiq texnika to‘planib qolgan suvlarni tortib olgan, chiqindilarni olib chiqib ketgan va boshqa vazifalarni bajargan. Shuningdek, FVV xodimlari ham bu jarayonga jalb etilgan.
Suv, asosan, Amir Temur, General Uzoqov ko‘chalari, “Ashxobod” bog‘i yaqinidagi tunnel va “Mirobod” dehqon bozorining old tomonidan toshgan.
“Bu ko‘chalar doim avtomobillar va odamlar bilan gavjum, qolaversa, ularda chiqindi tashlash uchun qutilar yetarli. Biroq kimlarningdir erinchoqligi yoki shunchaki odati bois mana shunday ko‘ngilsiz holatlar yuzaga kelmoqda.
Mashinadan chiqindi otayotganingizda yoki qo‘lingizdagi bo‘sh plastik idishni ariqqa tashlayotganingizda bitta meniki nima ham bo‘lardi, deb o‘ylarsiz. Ammo siz kabi o‘ylaydiganlar ko‘payib ketayotganligi bois 300 nafardan ortiq oila boshliqlari o‘sha tunni ariqlardagi siz tashlagan chiqindilarni tozalash bilan o‘tkazdi”, — deydi Rahimjonov.
Izoh (0)