Alisher Sa’dullayev O‘zbekistonning 14 ta hududida volontyorlar maktabi ochilishini ma’lum qildi

Yoshlar ishlari agentligi direktori Alisher Sa’dullayev 25-may, seshanba kuni “Toshkent 5 tashabbus harakati” yoshlar festivali doirasida o‘tkazilgan uchrashuvda O‘zbekistonda volontyorlar maktabi ochilishini qayd etdi. Bu haqda “Daryo” muxbiri xabar bermoqda.

“Dunyo bo‘yicha statistik ma’lumotlarga nazar tashlaganimizda volontyorlik tajribasiga ega bo‘lgan xodimlar yaxshi ish topishlari ehtimoli yuqori ekanligini ko‘rdik. Yana bir qiziq fakt: agar ish joylarida cheklov mavjud bo‘lsa, ular volontyorlik tajribasiga ega kishini tanlashadi. Chunki ushbu jarayonda qatnashish davomida mutaxassislar hayotiy ko‘nikmalarni egallaydilar — aloqaga kirishish, murosaga kelish, vaziyatni his qilish qobiliyati rivojlanadi.

Yordam berganlarning hammasi ham omma oldida ko‘rinish berishni yoqtiraverishmaydi. Volontyorlarga ularning madaniyat darajasini oshirish uchun bilim berish kerak. Volontyorlik O‘zbekistonda yangi tushuncha emas, faqat ilgari uni boshqacha nomlashgan. Biz O‘zbekiston volontyorlar assotsiatsiyasi bilan birgalikda volontyorlar maktabini ochishga qaror qildik. Bu nima uchun kerak? Gap shundaki, volontyorlik — hamma bilishi kerak bo‘lgan muhim ahamiyatga ega yo‘nalish. Chet mamlakatlarda volontyorlar ma’lum yo‘nalishni, yosh yoki din tanlamaydilar. Bu muhim umuminsoniy harakat, jamiyatning muhim elementi, shuning uchun ular uchun maydon yaratish kerak”, — dedi Sa’dullayev.

Uning ta’kidlashicha, ayni paytda universitetlar huzurida 30 ta volontyorlar markazini yaratish muhokama qilinmoqda.

“Yurtimiz bo‘ylab 14 ta hududda volontyorlar maktablari ochiladi. Har bir mintaqada ular uchun moddiy-texnik baza bilan jihozlangan alohida ofis bo‘ladi. Shuningdek, volontyorlar markazlarini ochish taklifi ham mavjud. Hozirda universitetlar huzurida 30 ta shunday markazni yaratish muhokama qilinmoqda. Bu talabalar bo‘sh vaqtida, darslar oralig‘i yoki yakunida yig‘ilishib, o‘zlarining loyihalarini muhokama qilishlari uchun xizmat qiladi”, — dedi Yoshlar ishlari agentligi direktori.