Buxorolik folbin ayol aldov yo‘li bilan fuqarodan 1300 dollar pul va moddiy boylik undirgani ma’lum bo‘ldi

Buxoroda o‘zini “folbin” deb e’lon qilib, jodugarlik bilan shug‘ullanib kelgan 33 yoshli ayol fuqaroning ishonchiga kirib, uning 1300 dollarga teng puli va moddiy boyligini qo‘lga kiritgani aniqlandi. Bu haqda “Daryo”ga viloyat IIB axborot xizmati rahbari Shuhrat Jalolov ma’lum qildi.

Ma’lum bo‘lshicha, Buxoro shahrining Jo‘bor ko‘chasida yashovchi, 1988-yilda tug‘ilgan ayol U.T. o‘zini “folbin” deb e’lon qilib, bir nechta fuqaroning ishonchiga kirib, daromad qilib kelgan. 2021-yilning aprel oyida U.T. xonadoniga kelib, shaxsiy hayotida ketma-ket muammolarga duch kelayotganini aytgan 32 yoshli fuqaro Sh.T.ning dardini tinglab, uning ishonchiga kirgan. Fuqaroning shaxsiy muammolaridan ustamonlik bilan foydalanib, unga shamlardan foydalanib, ilohlar bilan gaplasha olishini bildirgan. Aynan shu yo‘l bilan uning ham mushkulini oson qilishi va uning kelajagini oldindan aytib bera olishini aytib, evaziga U.T.dan 3000 dollar talab qilgan. Og‘ir ahvoldagi fuqaro folbin ayolning yolg‘onlariga ishongan va o‘zida mavjud bo‘lgan 1300 dollar pulini, shuningdek, pulga hisoblab, so‘nggi rusumdagi qo‘l telefonini sovg‘a qilgan.

Biroq oradan vaqt o‘tsa-da, shaxsiy hayotida o‘zgarish sezmagan Sh.T. yana U.T.ga murojaat qilgan. Fuqaroning yo‘llari faqat o‘zining duosi bilan ochilishiga sha’ma qilgan ayol undan yana moddiy manfaatdor bo‘lishga uringan. Ammo uning bu galgi urinishlari zoye ketgan.

O‘zining aldangani va ishonchining suiiste’mol qilingani haqida huquq-tartibot idoralariga ma’lum qilgan Sh.T.ning arizasi yuzasidan tezkor surishtiruv ishlari olib borilgan. Mazkur holat yuzasidan Buxoro shahar ichki ishlar organlari faoliyatini muvofiqlashtirish bo‘limi tomonidan 19-may kuni U.T.ning firibgarlik jinoyatini sodir etgani aniqlangan. Ayolga nisbatan Jinoyat kodeksining 168-moddasi 2-qismi, “a” bandi (firibgarlik) bilan jinoyat ishi qo‘zg‘atilgan.

“Ushbu jinoyat ishida gumonlanayotgan ‘folbin’ qonun oldida javob berishi, shubhasiz. Ammo hali ham folbinga doimiy ‘mijoz’ bo‘lib, boz ustiga yaqinlari va tanishlari, oila a’zolarini yetaklab keluvchi fuqarolarni aldanib qolmaslikka, folbin va jodugarlik bilan shug‘ullanuvchi shaxslarga ishonmaslikka chaqiramiz”, — deydi Shuhrat Jalolov.