Vazirlar Mahkamasining 20-maydagi qarori bilan O‘zbekistonda majburiy markirovkalashning boshlanish sanasi belgilandi. Qarorga ko‘ra, markirovkalashning yangi bosqichi dori vositalari va tibbiy buyumlar, suv va salqin ichimliklar, maishiy texnikalarga nisbatan tatbiq etiladi.
Ushbu mahsulotlarga nisbatan tajriba loyihasi quyidagi sanalarda boshlanadi:
- dori vositalari va tibbiy buyumlar — 2021-yil 1-iyun;
- suv va salqin ichimliklar — 2021-yil 15-iyun;
- maishiy texnikalar — 2021-yil 1-iyul.
Shuningdek, raqamli markalashni joriy qilish uchun zarur uskunalar bilan jihozlanishi kerak bo‘lgan tajriba loyiha ishtirokchilari — kompaniyalar ro‘yxati ham tasdiqlandi. Ro‘yxatda jami 16 ta kompaniya bo‘lib, ular orasida Coca-Cola, Foton, Texnopark, Sino, Artel, Roison, Hydrolife, Nobel Pharm, Jurabek Laboratories, Family Group va boshqalar bor.
Mahsulotni raqamli markirovkalash uchun zarur bo‘lgan uskunalarni va dasturiy ta’minotni tadbirkorlik subyektlari o‘z mablag‘lari hisobidan o‘rnatishi va sozlashi lozim.
Eslatib o‘tamiz, 2021-yil 1-martdan boshlab markirovka qilinmagan alkogol va tamaki mahsulotlarini O‘zbekiston hududiga olib kirish taqiqlangan. 2021-yil 1-iyuldan tuz, shakar va yog‘ miqdori yuqori bo‘lgan mahsulotlar, shuningdek, sog‘liq uchun zararli boshqa qo‘shimchalar mavjud mahsulotlarni markirovka qilish joriy etiladi.
Izoh (0)