Anvar Abduhalimov O‘zbekiston tashqi ishlar vazirining ma’naviy-ma’rifiy ishlar samaradorligini oshirish, Davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi etib tayinlandi, deb xabar bermoqda “Dunyo” AA.
Anvar Abduhalimov 1962-yilda Toshkentda tug‘ilgan. Toshkent davlat universiteti (hozirgi O‘zbekiston Milliy universiteti)ning sharqshunoslik fakultetini tamomlagan.
Tashqi ishlar vazirligining rasmiy vakili, matbuot kotibi Yusuf Qobuljonovning ma’lum qilishicha, Anvar Abduhalimov diplomatiya sohasida 1999-yildan buyon faoliyat yuritadi. Vazirlik markaziy apparati va O‘zbekistonning xorijdagi diplomatik vakolatxonalarida turli lavozimlarda ishlagan. 1999—2012-yillarda Tashqi ishlar vazirligi Osiyo va Afrika mamlakatlari boshqarmasida birinchi kotib, O‘zbekistonning Saudiya Arabistonidagi elchixonasida ikkinchi kotib, Misrdagi elchixonasida maslahatchi bo‘lgan.
2018-yildan buyon O‘zbekistonning Ummondagi elchisi lavozimida ishlab kelayotgandi.
Anvar Abduhalimov O‘zbekistonning Belarusdagi elchixonasiga maslahatchi etib tayinlangan Rahmatilla Nazarovning o‘rnini egalladi.
Avvalroq Tojikistonning O‘zbekistondagi yangi elchisi tayinlangani, O‘zbekiston elchisi Qirg‘iziston prezidenti Sadir Japarovga ishonch yorlig‘ini topshirgani haqida xabar berilgan edi.
Izoh (0)