Namanganda oltmishinchi bor o‘tkazilayotgan Xalqaro gullar festivali boshlandi. Bu haqda “Daryo” muxbiri Azizbek Abduvaliyev xabar bermoqda.
Festivalni an’anaga ko‘ra gullar bilan burkangan avtokarvon boshlab berdi.
Uning safida harbiy va qishloq xo‘jaligi texnikasi, antikvar avtomobillar va zamonaviy mashinalar, hatto elektromobillarni ham ko‘rish mumkin.
Namangan shahridagi Tinchlik maydonida festivalning rasmiy ochilish marosimi bo‘lib o‘tdi.
Unda diplomatlar, deputatlar, Namangan bilan birodarlashgan viloyat va shaharlarning mutasaddilari ishtirok etdi.
Namangan viloyati rasmiylari va mehmonlar Bobur bog‘ida tashkil etilgan ekspozitsiyalar bilan tanishdi. Festivalda ilk bor tumanlar ham o‘z pavilyonlari bilan qatnashdi.
Festivalning birinchi kuni kutilmagan yangiliklarga boy bo‘ldi.
Bog‘ning bir burchagidan ko‘kka havo sharlarii ko‘tarilgan bo‘lsa, yana bir manzilida mehmonlarga 15 metrli tort taqdim etildi.
Namangandagi gullar bayramini o‘z ko‘zi bilan ko‘rish uchun bu yerga xorijdan ko‘plab mehmonlar kelgan. Birgina Qirg‘izistondan kelganlar soni 150 nafardan oshiq ekani aytilmoqda.
Festivalga xorijiy OAV vakillari ham katta qiziqish bildirmoqda. Bayram tadbirlarida Buyuk Britaniya, Xitoy, Turkiya, Rossiya, Eron, Ozarbayjon, Pokiston, Afg‘oniston, Qozog‘iston, Tojikiston va Qirg‘izistondagi yetakchi nashrlar, telekanallar va saytlarning muxbir va operatorlarini uchratish mumkin. Ularning faoliyatiga ko‘maklashish uchun maxsus media-markaz tashkil etildi.
Xalqaro gullar festivali 31-may kunigacha davom etadi va bayram gala-konserti hamda g‘oliblarni taqdirlash bilan yakunlanadi.
Izoh (0)