Наманганда олтмишинчи бор ўтказилаётган Халқаро гуллар фестивали бошланди. Бу ҳақда «Дарё» мухбири Азизбек Абдувалиев хабар бермоқда.
Фестивални анъанага кўра гуллар билан бурканган автокарвон бошлаб берди.
Унинг сафида ҳарбий ва қишлоқ хўжалиги техникаси, антиквар автомобиллар ва замонавий машиналар, ҳатто электромобилларни ҳам кўриш мумкин.
Наманган шаҳридаги Тинчлик майдонида фестивалнинг расмий очилиш маросими бўлиб ўтди.
Унда дипломатлар, депутатлар, Наманган билан биродарлашган вилоят ва шаҳарларнинг мутасаддилари иштирок этди.
Наманган вилояти расмийлари ва меҳмонлар Бобур боғида ташкил этилган экспозициялар билан танишди. Фестивалда илк бор туманлар ҳам ўз павильонлари билан қатнашди.
Фестивалнинг биринчи куни кутилмаган янгиликларга бой бўлди.
Боғнинг бир бурчагидан кўкка ҳаво шарларии кўтарилган бўлса, яна бир манзилида меҳмонларга 15 метрли торт тақдим этилди.
Намангандаги гуллар байрамини ўз кўзи билан кўриш учун бу ерга хориждан кўплаб меҳмонлар келган. Биргина Қирғизистондан келганлар сони 150 нафардан ошиқ экани айтилмоқда.
Фестивалга хорижий ОАВ вакиллари ҳам катта қизиқиш билдирмоқда. Байрам тадбирларида Буюк Британия, Хитой, Туркия, Россия, Эрон, Озарбайжон, Покистон, Афғонистон, Қозоғистон, Тожикистон ва Қирғизистондаги етакчи нашрлар, телеканаллар ва сайтларнинг мухбир ва операторларини учратиш мумкин. Уларнинг фаолиятига кўмаклашиш учун махсус медиа-марказ ташкил этилди.
Халқаро гуллар фестивали 31 май кунигача давом этади ва байрам гала-концерти ҳамда ғолибларни тақдирлаш билан якунланади.
Изоҳ (0)