Gollivud yulduzi Leonardo Di Kaprio Galapagos orollaridagi tabiatni qutqarishga 43 million dollar yo‘naltiradi. Bu haqda aktyorning Instagram’dagi sahifasiga tayanib, Esquire xabar berdi.
“Yovvoyi tabiat xavf ostida. Biz uning barcha hududini to‘rtdan uch qismini yakson qildik va 1 milliondan ortiq tirik jonzot turlarining yo‘qolib ketishini xavf ostiga qo‘ydik. Agarda keskin harakat qilmasak, Yerda qolgan yovvoyi tabiat hududining yarmidan ko‘pi yaqin o‘n yillikda yo‘qolib ketishi mumkin”, — deb yozadi Di Kaprio. Uning so‘zlariga ko‘ra, muammolar uni Galapagos yovvoyi tabiatini himoya qilish va qayta tiklash kampaniyasini qo‘llab-quvvatlashga undagan.
The Guardian’ning yozishicha, tabiatni qutqarishda Di Kaprio ekolog-olimlar hamda aktyor tomonidan 2021-yilda asos solingan Re: wild kompaniyasi bilan hamkorlikda ishlaydi. Ekologik aksiya doirasida lemurlar, pushti iguanalar, Tasmaniya iblislari va yana yo‘qolib ketish xavfi ostidagi 50 dan ortiq hayvonlar yashovchi Florean orolini qayta tiklash loyihasi amalga oshiriladi.
Shuningdek, mablag‘lar yo‘qolib ketish xavfi ostida bo‘lgan hayvonlar sonini qo‘riqxonalarda qutqarish va Galapagos orollaridagi dengiz resurslarini turizm ta’siridan himoya qilishga qaratilgan dasturga sarflanadi.
Di Kaprio anchadan buyon ekofaollik bilan shug‘ullanadi va jamoatchilik fikrini ekologiya muammolariga qaratishga urinmoqda. Ushbu sohadagi turli muammolarga oldinroq 100 million dollardan ortiq mablag‘ sarflagan. 2014-yilda aktyor BMTda iqlim o‘zgarishi xavfi bo‘yicha nutq so‘zlagandi.
Izoh (0)