Сурхондарё вилояти Қумқўрғон туманидаги омбордан катта миқдорда чигит маҳсулотлари ўмариб кетилгани аниқланди, дея хабар бермоқда Тергов департаменти.
Маълум қилинишича, фуқаро 45 ёшли Х.А. Қумқўрғон тумани ИИБ бошлиғи номига алоқа хати орқали йўллаган мурожаатида 2021 йилнинг апрель ойи бошларида ва 1 май кунидан 2 май кунига ўтар кечаси унга тегишли Қумқўрғон туманида жойлашган МЧЖ омборхонасида сақланаётган ҳосил учун тарқатилишидан қолган жами 12 929 килограмм дориланган чигит маҳсулотлари номаълум шахслар томонидан ўғирлаб кетилганлигини маълум қилган.
Олиб борилган терговга қадар текширув ҳаракатлари давомида ушбу жиноятни Қумқўрғон туманида яшовчи фуқаролар 29 ёшли М.Ш., 33 ёшли Т.О., Х.А. ва 27 ёшли Х.У. содир этганлиги аниқланиб, ҳужжатсиз пахта чигитини ажратиш цехи, 67 килограмм пахта маҳсулоти, жами 624 килограмм дориланган чигит маҳсулотлари ашёвий далил тариқасида расмийлаштириб олинган.
Мазкур ҳолат юзасидан Қумқўрғон тумани ИИБ ҳузуридаги тергов бўлими томонидан Жиноят кодексининг 169-модда 2-қисми «в, г» бандлари (ўғрилик) билан жиноят иши қўзғатилган.
Ҳозирда тергов ҳаракатлари олиб борилмоқда.
Бундан аввал Юнусободда икки нафар талаба ўзганинг хонадонидан 60 минг долларлик автомобиль эҳтиёт қисмларини ўғирлаб кетгани, Тошкентга кетаётган такси ҳайдовчисига тош билан ҳужум қилиб, ёнидаги 4800 долларни олиб қочган шахс қўлга олингани ҳамда Тошкентда аввал ҳам ўғрилик учун судланган шахс 7,5 миллион сўмлик тилла тақинчоқларни ўмаргани ҳақида хабар берилганди.
Изоҳ (0)