Jinoyat ishlari bo‘yicha Xonqa tuman sudining raisi Maqsudbek Qilichyev avtohalokat sabab vafot etdi. Bu haqda Sudyalar oliy kengashi matbuot xizmati xabar bermoqda.
Maqsudbek Qilichyev 1978-yilda tug‘ilgan bo‘lib, faoliyatini “Xalq banki” Xiva filialida oddiy ishchi sifatida boshlagan. Oliy o‘quv yurtini tamomlagandan so‘ng, fuqarolik ishlari bo‘yicha Xorazm viloyati sudida kotib, Xiva tuman tovar ishlab chiqaruvchilar va tadbirkorlar palatasi axborot maslahat konsalting markazining huquqiy maslahatchisi, advokatlik firmasi rahbari vazifalarida ishlagan.
2012—2017-yillarda jinoyat ishlari bo‘yicha Qo‘shko‘pir tuman sudining raisi, vafotiga qadar jinoyat ishlari bo‘yicha Xonqa tuman sudi raisi lavozimida ishlab kelayotgan edi.
“Xabar.uz” nashrining Xorazm viloyati IIBdagi manbasiga tayanib yozishicha, yo‘l-transport hodisasi 17-may kuni tongda yuz bergan.
Dastlabki ma’lumotlarga ko‘ra, soat 05:30—06:00 larda Maqsudbek Qilichyev shaxsiy avtomashinasida Xiva shahrining xalq tilida “Obvandnaya” ko‘chasida ketayotib, xavfli aylanma burilishiga yetganda boshqaruvni yo‘qotgan. Oqibatda yo‘l bo‘yidagi daraxtga urilib, voqea joyida vafot etgan.
Hozirgi vaqtda Xiva shahar IIB hamda shahar prokuraturasi tomonidan surishtiruv harakatlari olib borilmoqda.
Avvalroq Farg‘onada ikki Cobalt ishtirokida sodir bo‘lgan YTHda 6 kishi, shu jumladan, 7 oylik chaqaloq vafot etgani, Namanganda Nexia, Damas va UAZ ishtirokidagi YTHda 2 kishi halok bo‘lgani, Qashqadaryoda “Jiguli” va Nexia ishtirokida sodir bo‘lgan YTH oqibatida 7 kishi halok bo‘lgani haqida xabar berilgan edi.
Izoh (0)