Ижтимоий тармоқларда Тошкент шаҳар ҳокими ўринбосари Бахтиёр Раҳмоновнинг Тошкент вилояти Оққўрғон тумани «Уста Нормат» маҳалла фуқаролар йиғини раиси Алишер Икромовни турли ножўя сўзлар билан ҳақоратлаб, унга нисбатан жисмоний куч ишлатгани ҳақида хабарлар тарқалди. Маҳалла ва оилани қўллаб-қувватлаш вазирлиги ходимини ҳимоя қилиш учун ўз ваколати доирасидаги барча чораларни амалга оширишини билдирди.
Вазирлик матбуот хизматининг билдиришича, воқеага аниқлик киритиш мақсадида Алишер Икромов билан боғланиб, ҳолат бўйича дастлабки маълумотларни олди.
Алишер Икромов берган маълумотларга кўра, 9 май куни у Бахтиёр Раҳмоновнинг ота уйига чақиртирилган. У бу ерда ўзининг хизмат вазифасига алоқадор бўлмаган, умуман бошқа бир масаланинг бажарилмаганлиги бўйича Бахтиёр Раҳмонов томонидан турли ножўя сўзлар билан ҳақоратланган, ҳатто унга нисбатан жисмоний куч ишлатган.
Айни вақтда мазкур ҳолат Маҳалла ва оилани қўллаб-қувватлаш вазири назоратига олинган ҳамда Вазирлик ишчи гуруҳи томонидан воқеа тафсилотлари батафсил ўрганилмоқда. Вазирлик ишчи гуруҳ хулосаси асосида Алишер Икромовнинг, умуман, маҳалла тизимидаги барча ходимларнинг ҳуқуқий манфаатларини ҳимоя қилиш бўйича қонунчиликда белгиланган ҳамда ўз ваколати доирасидаги барча чораларни амалга оширишини маълум қилди.
Эслатиб ўтамиз, Бахтиёр Раҳмонов 2021 йил январида Тошкент вилояти ҳокимлигига ўтказилган Даврон Ҳидоятов ўрнига Тошкент шаҳри ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари лавозимига тайинланганди. Тайинловга қадар 2018 йил майидан Олмазор туманига раҳбарлик қилиб келган.
Маълумот учун, 2013 йил 22 апрелда янги таҳрирда қабул қилинган, «Фуқароларнинг ўзини ўзи бошқариш органлари тўғрисида»ги қонунга кўра, фуқароларнинг ўзини ўзи бошқариш органлари фаолиятига давлат органларининг ва улар мансабдор шахсларининг аралашувига йўл қўйилмайди.
Маҳалла ва оилани қўллаб-қувватлаш вазирлиги Президентнинг 2020 йил 18 февралдаги фармонига асосан, фуқаролар йиғинлари ходимларини уларнинг вазифа ва фаолият йўналишлари билан боғлиқ бўлмаган йиғилиш ва бошқа тадбирларга жалб қилиш, уларнинг фаолиятига асоссиз аралашиш, тааллуқли бўлмаган вазифаларни юклаш талабларини бузганлиги учун давлат органлари ва ташкилотлари масъул ва мансабдор шахсларини эгаллаб турган лавозимидан озод этишгача бўлган жазо чораларини қўллаш бўйича бош вазирга ўрнатилган тартибда таклиф киритиб бориш ҳуқуқига эга.
Изоҳ (0)