Buyuk Britaniya qiroli Charlz III kelasi haftadan davlat vazifalarini davom ettirishga kirishadi. Bu haqda CNN nashri xabar berdi.
Manbada aytilishicha, Buyuk Britaniya qirolining “davolanish va sog‘ayish davri” yakunlangan. Endilikda u o‘zining vazifalarini bekam-u ko‘st ado eta oladi. Bu haqda Bukingem saroyidagi manbalar xabar bergan.
Bukingem saroyi xabariga ko‘ra, qirol so‘nggi ikki oy mobaynida saraton kasalligidan davolanayotgan bo‘lgan. Muolajalar yaxshi tugab, Charlz III ga ruxsat berilgan.
Qirol Charlz iyun oyi boshida Yaponiya imperatori Naruxito va uning rafiqasi Masakoni davlat tashrifi doirasida qabul qilishi eʼlon qilingan. Bu xabar ham davlat rahbari normal ish tartibiga qaytayotganiga bir ishora sifatida ko‘rilmoqda.
“Toj kiyishning bir yilligi yaqinlashar ekan, qirol janobi oliylari o‘tgan yildagi quvonch va qiyinchiliklar davomida dunyoning turli burchaklaridan ko‘rsatilgan ko‘plab yaxshiliklar va ezgu tilaklar uchun chuqur minnatdorlik bildiradilar”, — deyiladi Bukingem saroyi bayonotida.
Saroy matbuot kotibining taʼkidlashicha, qirol davolanishni davom ettiradi. Biroq shifokorlar hozirgacha erishilgan yutuqlardan ham yetarlicha mamnun ekanliklarini maʼlum qilishgan.
Izoh (0)