“Nadomat” loyihasining navbatdagi suhbatdoshi Farg‘ona viloyatida dunyoga kelgan. Oilaning kenja farzandi bo‘lgan yigit hech qanday qiyinchiliksiz ulg‘aygan. Afsuski, ota-onasi bolani yeb-ichirishdan tashqari, tarbiya berish ham kerakligini unutdimi yoki kenja farzand deb erkaladi, xullas 13-14 yoshdan boshlab uning qadam olishi o‘zgardi. Hammasi maktabga bormaslik va ko‘chada behuda vaqt o‘tkazishdan boshlandi. Ikki yil ichida bola o‘g‘rilik qilishga, eng yomoni umr zavoli bo‘lgan giyohvand va psixotrop moddalar isteʼmol qilish darajasiga yetdi.
Mahkum — 17 yoshda, u Jinoyat kodeksining 169-moddasi 3-qismi bilan uch yilga ozodlikdan mahrum etilgan.
U 16 yoshdan jinoiy sheriklari bilan o‘g‘rilik qilishni boshlagan. Bundan tashqari, psixotrop va giyohvand moddalarni isteʼmol qilgan.
— Dadam haydovchilik qilardi, onam esa uy bekasi. Oilada uchta farzandmiz, men kenjasiman. Erkatoy va ish qilishni yoqtirmaydigan bola edim. O‘rtoqlarim bilan ko‘chada yurishni yaxshi ko‘rardim. Kechasi ko‘chaga chiqib, ancha vaqtgacha gaplashib o‘tirardik. Bir kuni “Yur, aylanib kelamiz”, deyishdi. O‘shanda vaqt ancha kech edi. U o‘rtoqlarim mendan bir necha yosh katta, mashina haydashni bilishardi. Soat 23:00 da Farg‘onaning O‘zbekiston tumaniga borganmiz. “Nega bu yerga keldik?” deb so‘raganman. Chunki u yerga nima maqsadda borganimizni bilmasdim. Keyin bilsam, u yerga o‘g‘irlikka borgan ekanmiz. Noutbookni o‘g‘irladik va ertasi kuni uni 800 ming so‘mga pulladik. O‘sha puldan menga 300 ming so‘m ulush berishdi. Oradan 2-3 oycha vaqt o‘tib, tergov ishlari boshlandi, bilsam men kuzatuv kamerasiga tushib qolgan ekanman. Avvaliga 10-sonli tergov hibsxonasiga olib borishdi, keyin Tarbiya koloniyasiga olib kelishdi, — deydi mahkum.
Suhbat avvalida mahkum birinchi o‘g‘rilikdayoq qo‘lga tushganini va sheriklari qamalmay, faqatgina u ozodlikdan mahrum etilgani haqida gapirdi. Ammo ko‘p o‘tmay bu ilk o‘g‘rilik bo‘lmaganini tan oldi.
— Noutbook birinchi o‘g‘rilik bo‘lmagan. Undan avval kabel apparatlari va telefonlarni ham o‘g‘irlaganmiz. Bu ishni qilishimga psixotrop tabletkalarni isteʼmol qilishim sabab bo‘lgan. O‘g‘rilik qilayotganda tabletka taʼsirida bo‘lardim, nima qilayotganimni bilmasdim, — deydi mahkum.
Suhbat davomida psixotrop tabletkalarni isteʼmol qilishni unga kim o‘rgatgani va qayerdan sotib olganiga ham qiziqdik.
— O‘rtoqlarim chekishardi, ulardan ko‘rib o‘rganganman. Tabletkani ichardik, baʼzan burnimizga sepib kayf qilardik. O‘g‘irlik qilib topgan pulimizga tabletka olardik va chekkaroq, odamlardan holi joyga borib isteʼmol qilardik. Uni chekkandan keyin nima qilayotganimizni bilmay qolardik. Uni har kuni isteʼmol qilardim, kayfim tarqaguncha ko‘chada aylanib yurardim. Shuning uchun ancha vaqtgacha uydagilarim tabletka isteʼmol qilayotganimni bilmagan. Bir kuni o‘zimni bilmay, uyga kirib kelganman. O‘shanda ko‘zlarim qizarib ketganidan ota-onam tabletka haqida bilib qolishgan. Akam rosa urgan, qaytib bu ishni qilmaslikni tayinlagan. O‘rtoqlarimga qo‘shilmasligim uchun bir oyga yaqin uydan ko‘chaga chiqarishmagan. Qochib ketaverganimdan keyin oyog‘imdan zanjirlab, bog‘lab qo‘yishgandi. Ammo xumor tutganda zanjirni uzib ham qochib ketganman, — deydi mahkum.
Mahkumga nisbatan to‘rtta holat bo‘yicha jinoiy ish qo‘zg‘atilgan. U hozirda ikki epizod bo‘yicha (169-moddasi 3-qismi) uch yilga ozodlikdan mahrum etilgani va yana ikki holat bo‘yicha tergov jarayonlari davom etayotgani haqida gapirdi.
— 16 yoshdan o‘g‘rilik qilishni boshlaganman. Hozir ikkita epizod (o‘g‘irlik bo‘yicha) jazo muddatimni o‘tayapman. Yana ikkita epizod bo‘yicha tergov jarayonlari davom etyapti. Sud qaroriga ko‘ra, jazo muddatim yana ko‘payishi mumkin, — deydi mahkum.
17 yoshida ozodlikdan mahrum etilib, o‘g‘ri va giyohvand deya taʼriflanayotgan mahkumning ota-onasi tarbiyada qanday xatoga yo‘l qo‘ydi?
— Aka-opamning tarbiyasi yaxshi, ular institutda o‘qishgan. Men juda erka bo‘lganman. Kuniga 50 ming so‘mdan pul berishardi. Har doim yaxshi yeb-ichishimni istashardi. Xatom shuki, o‘zimdan katta bolalarga qo‘shilib qoldim. Ular psixotrop tabletkalar sotiladigan dorixonalarni ko‘rsatishdi, pulim yo‘qligida esa o‘g‘rilikka o‘rgatishdi. Agar vaqt ortga qaytganida, bunday qilmasdim. Ammo endi kech, — deydi mahkum.
Videoni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)