Bayden ma’muriyati mamlakatda kiberxavfsizlik sohasiga 20 mlrd dollar ajratadi

Jo Bayden ma’muriyati AQShda kiberxavsizlik sohasini rivojlantirishga 20 milliard dollar yo‘naltiradi. Bu mamlakat prezidenti tomonidan avval taqdim etilgan umumiy miqdori 2,3 trillion dollarlik yangi ish o‘rinlarini yaratish rejasini (The American Jobs Plan) amalga oshirish doirasida bajariladi. Bu haqda Oq uy bayonotiga tayanib “TASS” xabar berdi.

“Kiberxavfsizlik hozirgi zamonning eng dolzarb masalalaridan biri hisoblanadi, shuning uchun prezident Bayden AQShda kiberxavfsizlikni kuchaytirishni ustuvor vazifaga aylantirdi va ushbu vazifani bajarish uchun choralar ko‘ra boshladi”, — deyiladi bayonotda.

Taklif etilayotgan reja doirasida federal darajadan mahalliy o‘zini o‘zi boshqarish organlari darajasiga qadar milliy energetika infratuzilmasiga kiritilgan kompyuter tizimlarini modernizatsiya qilish sohasiga 20 milliard dollar investitsiya kiritish taklif qilindi. Ushbu mablag‘lar hayotga tatbiq etiladigan yangi loyihalarni amalga oshirish hamda faoliyat yuritayotgan energiya va elektron tizimlarning xavfsizligini kuchaytirish uchun sarflanadi.

Modernizatsiyalashda so‘nggi texnologiyalardan foydalaniladi, xavfsizlik va atrof-muhitni muhofaza qilish sohasida eng so‘nggi standartlar qo‘llaniladi.

“Baydenning The American Jobs Plan dasturi har bir amerikalikka arzon, ishonchli, tezkor va keng miqyosli internetga ulanish imkoniyatini beradi. Shuningdek, ushbu tarixiy investitsiya tarmoq xavfsizligini ta’minlash uchun xizmat qiladi”, — deyiladi Oq uy bayonotida.

Ushbu ishlarning bajarilishini osonlashtirish va ularni bajarishga pudratchilarni jalb qilish maqsadida belgilangan modernizatsiyani amalga oshirish uchun shart-sharoitlar yaratadigan kompaniyalar uchun soliq va kredit imtiyozlari choralari ishlab chiqiladi.

Avvalroq Jo Bayden sobiq prezident Donald Tramp tomonidan 2020—2021-yillarda imzolangan yettita farmonni bekor qilgani haqida xabar berildi.

Prezidentlikning birinchi kuniyoq Bayden Tramp tomonidan qabul qilingan bir nechta farmonlarni bekor qila boshlagan edi. Xususan, Bayden Trampning iqlim bo‘yicha Parij bitimi va JSSTdan chiqish to‘g‘risidagi qarorlarini hamda mamlakatga ayrim toifadagi chet elliklarning kirishini taqiqlovchi hujjatni bekor qilgan.