Тошкент вилояти Ангрен шаҳрида ҳайвонларга нисбатан шафқатсиз муносабатда бўлгани ҳақида хабар берилди. Ҳолат юзасидан Тошкент вилояти ИИББ изоҳ берди.
Маълум қилинишича, 17 май куни қаровсиз ҳайвонларни ҳимоя қилиш бўйича фаоллар гуруҳи, «Меҳр ва Оқибат» нодавлат ташкилоти Ангрен шаҳридаги уйсиз ҳайвонларни ушлаш хизмати ходимларининг ноўрин ҳаракатлари сабаб ўзининг Telegram каналида мурожаат қилган.
Ушбу ҳолат Ангрен шаҳар ИИБ томонидан ўрганилиб, тегишли чора кўрилди.
Хусусан, Ангрен шаҳар 5/4 даҳаси, 4-уйда жойлашган шаҳар Ободонлаштириш бошқармаси ҳузуридаги Эгасиз, ёввойи ва қаровсиз ҳайвонларни ушлаш бўлими ва ушбу бошқарма раҳбари Б.М. ва унинг қўл остида ишловчи Т.А., Т.С. ва О.П. билан ҳолат юзасидан суриштирув ўтказилди.
Ушбу фуқароларнинг хатти-ҳаракатида Маъмурий жавобгарлик тўғрисидаги кодекснинг 111-моддасида (ҳайвонларга нисбатан шафқатсиз муносабатда бўлиш) кўрсатилган ҳуқуқбузарлик мавжудлиги сабабли, бошқарма бошлиғи Б.М.га нисбатан тегишли ҳужжатлар расмийлаштирилди. Хизмат ходимларига келгусида ўз хизмат вазифасидан четга чиқмасдан хизмат олиб боришлари ҳақида қаттиқ огоҳлантирилди.
Шунингдек, олинган маълумотга кўра Олмалиқ шаҳрида бу каби ҳолат кузатилмаган.
Маълумот учун, юқоридаги модда бўйича айбдор деб топилган шахсга базавий ҳисоблаш миқдорининг бир бараваридан уч бараваригача (245 минг сўмдан 735 минг сўмгача) миқдорда жарима солишга сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, — базавий ҳисоблаш миқдорининг уч бараваридан беш бараваригача (735 минг сўмдан 1 миллион 225 минг сўмгача) миқдорда жарима солишга ёки ўн беш суткагача маъмурий қамоққа олишга сабаб бўлади.
Бундан аввал Экология қўмитаси Бўстонлиқда «Қизил китоб»га киритилган айиқ россиялик овчи томонидан ўлдирилишига нега рухсат берилганига изоҳ берганди, Тошкентда мушукни полиэтилен пакетга солиб, чиқиндига ташлаган эркакка нисбатан чора кўрилгани ҳамда Тошкентда ўқ билан яраланган ит топилгани ҳақида хабар берилганди.
Изоҳ (0)