Toshkentning Uchtepa tumanida quroldan otilgan o‘q bilan yaralangan it topildi. Bu haqda “Mehr va oqibat” hayvonlarni himoya qilish jamiyati xabar berdi, deb yozmoqda “Gazeta.uz”
Ma’lum bo’lishicha, ariqdan chiqmoqchi bo‘lgan yarador itni befarq bo‘lmagan shahar fuqarosi payqagan. Itni mashina urib yubordi, degan taxmin bilan u hayvonlarni himoya qilish jamiyatiga bu haqda xabar bergan.
Volontyorlarning sa’y-harakatlari bilan it veterinariya klinikasiga olib borilgan, bu vaqtda uning ahvoli keskin yomonlashgan. Shifokorlar rentgen suratlari yordamida hayvonga qurol bilan o‘q uzilganligini aniqlagan. O‘q itning to‘qimalarida joylashgan, hozirda hayvonga intensiv terapiya o‘kazilmoqda.
Itga Milli deb nom berilgan. Volontyorlar kuratori hayvonni davolash uchun xayriya mablag‘i uchun yig‘im e’lon qildi.
Hayvonlarni himoya qilish jamiyati ushbu voqea yoki hayvonlarga nisbatan shafqatsizlik qilingani haqida boshqa holatlarga guvoh bo‘lganlardan “Mehr va oqibat” jamiyatining 93-812-04-13 ishonch telefoniga murojaat qilishni so‘ragan.
Avvalroq Toshkent viloyatidagi cho‘chqa fermasida go‘shtini sotish maqsadida itlar ommaviy ravishda otib o‘ldirilayotgani haqida xabarlar tarqalgan, keyinchalik bu xabar o‘z tasdig‘ini topmagani haqida xabar berilgan edi. Undan avval O‘zbekiston FVV boshpanasiz itlar otib tashlanishi to‘g‘risidagi xabarlarni rad etgan edi.
Izoh (0)