Makron Fransiya xavfsizligi izdan chiqishi to‘g‘risida uchinchi maktubni oldi

Fransiyaning 90 dan ortiq nafaqaga chiqqan politsiyachisi mamlakatning xavfsizlik masalalariga jiddiy e’tibor qaratishini talab qilib, davlat rahbari Emmanuel Makronga xat yozdi. Bu haqda Valeurs Actuelles nashriga tayanib, “RBK” xabar berdi.

Sobiq politsiya xodimlari mamlakatda “xavfsizlik va jamiyat osoyishtaligi masalasida o‘ta jiddiy vaziyat” yuzaga kelganini ta’kidlab, hukumatni bu muammoni nazorat ostiga olishga chaqirdi. Shuningdek, ular Fransiyada “mamlakatni qayta zabt etish uchun choralar ko‘rish” kerakligini aytmoqda.

Sobiq politsiyachilarning aniqlik kiritishicha, mamlakatning ba’zi hududlarida qonunlar ishlamaydi, “tajovuzkor guruhlar” esa hukumatga qarshi chiqmoqda.

Prezidentga murojaat mualliflari “urushning oldini olish uchun” politsiya xodimlarini harbiy xizmatchilar bilan almashtirishni to‘xtatish kerakligini ta’kidlamoqda.

Maktubga Milliy politsiya rahbari Frederik Vo javob qaytardi. U nafaqaga chiqish sobiq politsiyachilarni jamoat tartibini saqlashdan ozod qilmasligini aytdi va hukumatning politsiya xodimlarini himoya qilish borasida sezilarli yutuqlarga erishganini ta’kidladi. Politsiya rahbari sobiq hamkasblarining demarshi politsiya institutini kuchaytirish o‘rniga, uni susaytiradi, deb xulosa berdi.

Aprel oyining oxirida nafaqadagi va amaldagi bir guruh politsiya xodimlari diniy ekstremistlarning mamlakatdagi turli hududlarda o‘z qoidalarini o‘rnata boshlaganini qayd etib, Makronga maktub yo‘llagan edi. Ular aslida mamlakatda irqiy kurash ketayotganini aytgan.

Fransiya Qurolli kuchlarining shtab rahbari xat mualliflari jazolanishini ma’lum qilgan. Mamlakat qonunlariga muvofiq, harbiylarning siyosiy yoki diniy masalalarga munosabat bildirishi taqiqlanadi.

Shunga qaramay, may oyining boshida amaldagi harbiy xizmat xodimlari Makronga, shuningdek, vazirlar, parlament a’zolari va oliy harbiy amaldorlarga xat yozdi. Ular o‘z murojaatida hukumatning birinchi xat mualliflariga bo‘lgan munosabatini qoralab, maktub yo‘llovchilarga “isyonchiga qilingandek muomalada bo‘lgani, lekin ularning yagona aybi o‘z vatanini sevishi, uning tanazzulidan xavotirda ekani”ni ta’kidlagan.

Ikkinchi maktub mualliflari ham Fransiyada yuzaga kelishi mumkin bo‘lgan fuqarolar urushi, mamlakatga nisbatan tahdidlarning ortib borishi haqida ogohlantirgan.

Avvalroq Makron Parij yaqinida politsiyachining o‘ldirilishini diniy ekstremizm deb atagan edi. Qotillik politsiya uchastkasining kiraverishida sodir etilgan. Jinoyatchi binoga kirayotgan ayolga hujum qilib, uning tomog‘iga pichoq urgan. Boshqa politsiya xodimlari jinoyatchiga qarata o‘q uzgan va u voqea joyida halok bo‘lgan.

Eslatib o‘tamiz, 2020-yilning oktabr oyida Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Muhammad payg‘ambar (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik 18 yoshli muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.

Keyinchalik Makron Muhammad (s.a.v.) karikaturalari tufayli musulmonlarda paydo bo‘lgan his-tuyg‘ularni tushunishini aytdi, ammo ularni hukumat emas, mustaqil OAVlar chiqarayotganini ta’kidladi.