Makron Parij yaqinida politsiyachining o‘ldirilishini diniy ekstremizm deb atadi

Fransiya prezidenti Emmanuel Makron Parij tashqarisidagi Rambuye shaharchasida politsiya xodimining o‘ldirilishini diniy ekstremizmning namoyishi deb atadi. Bu haqda “RBK” xabar berdi.

“Stefani Rambuye komissariatida ishlar edi. Butun millat u tomonda, politsiya tomonda. Biz hech qachon diniy ekstremizmga qarshi kurashda taslim bo‘lmaymiz”, — deb yozdi Makron o‘zining Twitter sahifasida.

Jinoyat joyiga yetib kelgan hukumat rahbari Jan Kasteks sodir bo‘lgan voqeani johillik va qo‘rqoqlik deb atadi hamda gap terakt haqida ketayotganini aytdi.

Ivelin departamentining tergov-surishtiruv organlari ushbu jinoyat ishini Terrorizmga qarshi kurash milliy prokuraturasiga topshirdi.

O‘z navbatida, Parij va Rambuyeni o‘z ichiga oluvchi Il de Frans hududining rahbari Valeri Pekress sodir bo‘lgan voqeaning bir nechta versiyalari, shu jumladan, terakt o‘rganib chiqilayotganini ma’lum qildi.

Qotillik politsiya uchastkasining kiraverishida sodir etilgan. Jinoyatchi binoga kirayotgan ayolga hujum qilib, uning tomog‘iga pichoq urgan. Boshqa politsiya xodimlari jinoyatchiga qarata o‘q uzgan va u voqea joyida halok bo‘lgan.

Jinoyatchining shaxsiga hali aniqlik kiritilmadi. Ma’lumotlarga ko‘ra, u Tunis fuqarosi bo‘lgan, Fransiyaga esa 2009-yilda kelgan.

Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.

Makron bu qotillikni “Islom terrorchiligiga xos xatti-harakat” deb atadi. U, shuningdek, Islom dini “butun dunyoda inqiroz holatini boshdan kechirayotgani” haqida fikr bildirdi.

Makronning bu gaplari ko‘plab davlatlarda musulmonlarning g‘azabiga sabab bo‘ldi. Ular Fransiya va Makronga qarshi noroziliklar bildira boshladi. Ba’zi namoyishchilar Fransiya bayrog‘i va Makronning suratlarini toptagan. Bunday norozilik aksiyalari Pokiston, Livan, Turkiya, Falastin va boshqa davlatlarda bo‘lib o‘tdi.

Keyinchalik Makron Muhammad (s.a.v.) karikaturalari tufayli musulmonlarda paydo bo‘lgan his-tuyg‘ularni tushunishini aytdi, ammo ularni hukumat emas, mustaqil OAVlar chiqarayotganini ta’kidladi.