Yevropa Ittifoqi davlatlari Hindistondan keluvchilar uchun cheklovlar joriy qiladi

Yevropa Komissiyasi 12-may kuni Yevroittifoq mamlakatlarini Hindistondan Yevropa Ittifoqiga sayohat qilishni vaqtincha cheklash bo‘yicha muvofiqlashtirilgan choralar ko‘rishga chaqirdi, undan maqsad birinchi bo‘lib Hindistonda aniqlangan koronavirusning B.1.617.2 varianti keng tarqalishini cheklash ekani aytildi, deb yozmoqda “Interfaks”.

Yevrokomissiya bayonotiga ko‘ra, ushbu qadam 2021-yil 10-may kuni Jahon sog‘liqni saqlash tashkiloti (JSST) tomonidan virusning bu ko‘rinishini “tashvishlantiruvchi variant” deb tasniflash taklifi natijasida amalga oshirildi.

“Asosli sabablarga ko‘ra Hindistondan kelishi mumkin bo‘lganlar sonini qat’iyan minimal darajagacha kamaytirish va Hindistondan Yevropa Ittifoqiga kelish imkoniyati saqlanib qolganlar uchun PZR-testlarini topshirish hamda ularni majburiy karantinga olish muhim hisoblanadi”, — deyiladi Yevrokomissiya xabarida. Ushbu choralar sayohatchilarning emlangan, emlanmaganidan qat’i nazar qo‘llanilishi kerak. Yevropa Ittifoqi fuqarolari va rezidentlari, shuningdek ularning oila a’zolarida Yevropa bo‘ylab erkin harakatlanish imkoniyati saqlanib qolishi kerak, deb qayd etiladi bayonotda.

Koronavirusning ushbu variantiga qarshi to‘liq muvofiqlashtirilgan va samarali choralarni ishlab chiqish uchun hamda Hindistondagi pandemik vaziyatning yomonlashishini hisobga olgan holda, Yevrokomissiya ittifoq davlatlariga hindistonliklarning mintaqaga kelishini “favqulodda muz latish” choralarini qo‘llash taklifini berdi.

Yevrokomissiya 3-may kuni Yevropa Ittifoqi Kengashining pandemiya sharoitida maqsadsiz sayohatlarni cheklash bo‘yicha tavsiyalariga bu kabi “favqulodda muzlatish mexanizmi”ni qo‘shishni taklif qilgan edi. Shu bilan birga, Yevropa Komissiyasi mintaqaga oilaviy sharoit taqozosi bilan, xalqaro himoya so‘rab yoki boshqa gumanitar sabablarga ko‘ra kelgan shaxslarga nisbatan bunday cheklovlar qo‘llanmasligi kerakligini ta’kidlab o‘tdi.

Avvalroq Hindistonning Bixar shtatida Ganga daryosidan COVID-19 tufayli vafot etgani taxmin qilinayotgan kamida o‘ttiz kishining jasadi topilgani ma’lum bo‘ldi. Gazetaning mahalliy ma’muriyatga asoslanib xabar berishicha, jasadlar bir necha kun oldin qo‘shni Uttar-Pradesh shtatidan daryoga tashlangan bo‘lishi mumkin.

Shuningdek, Hindistonda COVID-19 bilan kasallangan bemorlarda “qora zamburug‘” (mukormikoz) epidemiyasi qayd etilayotgani haqida xabar berildi. Hindistonlik mutaxassis Akshay Nairning fikricha, mukoromikoz bilan kasallanish darajasining o‘sishi koronavirusning og‘ir shaklini davolashda steroidlardan foydalanish sabab bo‘lgan bo‘lishi mumkin. “Qora zamburug‘”dan o‘lim darajasi 50 foizni tashkil etadi.