Европа Иттифоқи давлатлари Ҳиндистондан келувчилар учун чекловлар жорий қилади

Европа Комиссияси 12 май куни Евроиттифоқ мамлакатларини Ҳиндистондан Европа Иттифоқига саёҳат қилишни вақтинча чеклаш бўйича мувофиқлаштирилган чоралар кўришга чақирди, ундан мақсад биринчи бўлиб Ҳиндистонда аниқланган коронавируснинг B.1.617.2 варианти кенг тарқалишини чеклаш экани айтилди, деб ёзмоқда «Интерфакс».

Еврокомиссия баёнотига кўра, ушбу қадам 2021 йил 10 май куни Жаҳон соғлиқни сақлаш ташкилоти (ЖССТ) томонидан вируснинг бу кўринишини «ташвишлантирувчи вариант» деб таснифлаш таклифи натижасида амалга оширилди.

«Асосли сабабларга кўра Ҳиндистондан келиши мумкин бўлганлар сонини қатъиян минимал даражагача камайтириш ва Ҳиндистондан Европа Иттифоқига келиш имконияти сақланиб қолганлар учун ПЗР-тестларини топшириш ҳамда уларни мажбурий карантинга олиш муҳим ҳисобланади», — дейилади Еврокомиссия хабарида. Ушбу чоралар саёҳатчиларнинг эмланган, эмланмаганидан қатъи назар қўлланилиши керак. Европа Иттифоқи фуқаролари ва резидентлари, шунингдек уларнинг оила аъзоларида Европа бўйлаб эркин ҳаракатланиш имконияти сақланиб қолиши керак, деб қайд этилади баёнотда.

Коронавируснинг ушбу вариантига қарши тўлиқ мувофиқлаштирилган ва самарали чораларни ишлаб чиқиш учун ҳамда Ҳиндистондаги пандемик вазиятнинг ёмонлашишини ҳисобга олган ҳолда, Еврокомиссия иттифоқ давлатларига ҳиндистонликларнинг минтақага келишини «фавқулодда муз латиш» чораларини қўллаш таклифини берди.

Еврокомиссия 3 май куни Европа Иттифоқи Кенгашининг пандемия шароитида мақсадсиз саёҳатларни чеклаш бўйича тавсияларига бу каби «фавқулодда музлатиш механизми»ни қўшишни таклиф қилган эди. Шу билан бирга, Европа Комиссияси минтақага оилавий шароит тақозоси билан, халқаро ҳимоя сўраб ёки бошқа гуманитар сабабларга кўра келган шахсларга нисбатан бундай чекловлар қўлланмаслиги кераклигини таъкидлаб ўтди.

Аввалроқ Ҳиндистоннинг Бихар штатида Ганга дарёсидан COVID-19 туфайли вафот этгани тахмин қилинаётган камида ўттиз кишининг жасади топилгани маълум бўлди. Газетанинг маҳаллий маъмуриятга асосланиб хабар беришича, жасадлар бир неча кун олдин қўшни Уттар-Прадеш штатидан дарёга ташланган бўлиши мумкин.

Шунингдек, Ҳиндистонда COVID-19 билан касалланган беморларда «қора замбуруғ» (мукормикоз) эпидемияси қайд этилаётгани ҳақида хабар берилди. Ҳиндистонлик мутахассис Акшай Наирнинг фикрича, мукоромикоз билан касалланиш даражасининг ўсиши коронавируснинг оғир шаклини даволашда стероидлардан фойдаланиш сабаб бўлган бўлиши мумкин. «Қора замбуруғ»дан ўлим даражаси 50 фоизни ташкил этади.