Тошкентнинг Олмазор, Миробод ва Яккасарой туманларида давлат органлари ва ташкилотлари жойлашган ер участкалари, бино ва иншоотлар инвентаризация қилинади. Бу ҳақда Президентнинг «Хизматлар соҳасини жадал ривожлантириш чора-тадбирлари тўғрисида»ги қарорида кўзда тутилган.
Ушбу ҳудудлар давлат органлари ва ташкилотлари жойлашган ер майдонлари ва бино-иншоотлардан самарали фойдаланишни таъминлаш бўйича ишчи гуруҳ томонидан танқидий кўриб чиқилади. Ишчи гуруҳга бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоров раҳбарлик қилади.
Кўриб чиқиш якунларига кўра, ишчи гуруҳ тадбиркорлик субъектларига хизмат кўрсатиш объектларини барпо этиш учун ажратиш мақсадида мақбуллаштириш бўйича Вазирлар Маҳкамасига таклифлар киритади.
Бундан ташқари, ишчи гуруҳга ижтимоий ва ишлаб чиқариш инфратузилмасини ривожлантириш дастурлари доирасида давлат органлари ва ташкилотлари учун бино ва иншоотлар қуришни мақбуллаштирган ҳолда уларни тадбиркорлик субъектларига тегишли биноларда ижара асосида жойлаштириш тизимини кенг жорий қилиш чораларини кўриш топширилган.
Эслатиб ўтамиз, 10 май куни давлат хизматлари кўрсатиш соҳасидаги ислоҳотлар натижадорлигига оид тақдимот билан танишган Шавкат Мирзиёев соҳани янада ривожлантириш, аҳолига қулайликларни ошириш бўйича устувор вазифаларни белгилаб берганди.
Хусусан, хорижий тажриба асосида, 2021 йил якунигача давлат хизматлари марказлари орқали кўрсатиладиган хизматлар сонини 200 тага етказиш вазифаси қўйилди. Барча 716 та давлат хизматини инвентаризация қилиб, уларнинг муддатлари, тўлов миқдорлари, шартлари ва бошқа талабларини соддалаштириш бўйича кўрсатма берилди.
Аввалроқ Президентнинг «Хизматлар соҳасини жадал ривожлантириш чора-тадбирлари тўғрисида»ги қарори билан 2021 йил 1 сентябрга қадар Ўзбекистоннинг йирик шаҳарлари, вилоят ва туман марказларида савдо ва кўнгилочар кўчалар ташкил этилиши ҳақида хабар берилган эди.
Изоҳ (0)