Шавкат Мирзиёев муаммоли кредитлар бўйича масъул раҳбарларни танқид қилиб, қарздорликларни ундириш юзасидан топшириқ берди

Президент Шавкат Мирзиёев раислигида 12 май, чоршанба куни ўтказилган йиғилишда давлат раҳбари муаммоли кредитлар ҳақида сўз юритиб, масъул раҳбарларни танқид қилди, дея хабар бермоқда «Дарё» мухбири.

«Соҳалар кесимида саноатда – 3 триллион сўм, савдо ва хизмат кўрсатишда – 2,1 триллион сўм, қишлоқ хўжалигида 1,8 триллион сўм, қурилишда – 978 миллиард сўм, транспорт ва коммуникацияда – 547 миллиард сўмлик муаммоли кредитлар вужудга келган.

Агар бу пуллар иқтисодга қайтса, қанча фойда бўларди? Агар қайтмаса, бу кредитларни кимларга бергансизлар?! Бу пуллар қайтиши ҳозир иқтисодиётимизга ҳаводек зарур. Бу йил иқтисодиётимизга мисли кўрилмаган пул сарфладик.

Ҳудудлар кесимида Жиззах, Самарқанд Сурхондарё ва Тошкент вилоятларининг ҳар бирига қарийб 1 триллион сўмдан муаммоли кредитлар тўғри келмоқда», — деди Президент.

Қайд этилишича, бу маблағларни қайтаришга Бош вазир ўринбосарлари, вилоят, туман ва шаҳар ҳокимлари, сектор ва тижорат банклари раҳбарлари шахсан жавобгар бўлади.

«Бунда, Умурзоқов – 5 триллион сўм, Қўчқоров – 4,2 триллион сўм, Раматов – 2,2 триллион сўм, Ғаниев – 1,8 триллион сўм, Мусаев – 120 миллиард сўм, Абдуҳакимов – 103 миллиард сўмнинг қайтимига тармоқ ва ҳудуд раҳбарлари билан бирдек жавоб беради.

Бош вазир ўринбосарлари вилоят ҳокимлари билан бирга, икки ҳафта муддатда ўз комплексига кирувчи корхоналарнинг муаммоли қарздорлигини тўлиқ хатловдан ўтказиб, иккинчи чорак якунига қадар уларнинг камида 25 фоизини, йил якунига қадар эса 100 фоиз қайтимини таъминлаш бўйича ҳудудлар ва тармоқлар кесимида графикни тасдиқласин», — деди давлат раҳбари.

Шавкат Мирзиёев оилавий тадбиркорлик дастурлари доирасидаги муаммоли қарздорликларни ундириш бўйича ҳам сўз юритди.

«Оилавий тадбиркорлик дастурлари бўйича 466 миллиард сўмлик муаммоли қарздорликларни ундиришга Зохидов, Холхўжаев вилоят, туман ва шаҳар ҳокимлари, сектор раҳбарлари билан бирга масъул ва жавобгар бўлади.

Қорақалпоғистон – 14 миллиард сўм, Андижон – 68 миллиард сўм, Бухоро – 13 миллиард сўм, Жиззах – 27 миллиард сўм, Қашқадарё – 39 миллиард сўм, Навоий – 24 миллиард сўм, Наманган – 67 миллиард сўм, Самарқанд – 44 миллиард сўм, Сурхондарё – 35 миллиард сўм, Сирдарё – 48 миллиард сўм, Тошкент вилояти – 19 миллиард сўм, Фарғона – 41 миллиард сўм, Хоразм – 16 миллиард сўм ва Тошкент шаҳри – 10 миллиард сўм», — деди Президент.