Болгария президенти Румен Радев Миллий ассамблея (парламент)ни тарқатиб юбориш ва 11 июлда парламент сайловларини ўтказиш тўғрисидаги фармонни имзолади. Бу ҳақда давлат раҳбари матбуот хизматига таяниб «ТАСС» хабар берди.
«Президент Румен Радев ўзининг фармони билан 2021 йил 12 майда бўлиб ўтадиган 45-Халқ ассамблеясини тарқатиб юборди. Давлат раҳбари парламент сайловларини жорий йилнинг 11 июлига белгилади», — дейилади хабарда.
Шунингдек, Болгария президенти 12 майдан бошлаб 46-чи Халқ ассамблеясига янги сайловлар ўтказилгунга қадар мамлакатни бошқарадиган техник ҳукуматни тайинлаш тўғрисидаги фармонни имзолади. Хавфсизлик ва мудофаа бўйича давлат раҳбарининг собиқ котиби Стефан Янев техник кабинетнинг бош вазири этиб тайинланди.
Болгариянинг техник ҳукумати учун расмий тақдимот маросими 12 май куни бўлиб ўтади, ўша куни президент Румен Радев ўз фаолиятидаги устувор йўналишларни ҳам тақдим этади.
Болгариянинг 45-Халқ ассамблеяси 4 апрелда сайланган, аммо мамлакатнинг янги ҳукуматини тузиш борасида келиша олмаган. Дастлаб ғолиб бўлган «Фуқаролар Болгариянинг европача тараққиёти тарафдори» партияси «Демократик кучлар иттифоқи» билан коалицияда ҳукумат тузишга уринди, аммо парламентдаги кўпчиликнинг қўллаб-қувватловига эриша олмади.
«Шундай халқ бор» янги сиёсий партияси ўзининг Вазирлар Маҳкамасини таклиф қилиш ҳуқуқидан бош тортди. «Болгария Социалистик партияси Болгария учун» коалицияси ҳам ўз ваколатларини президентга қайтаришга мажбур бўлди.
Ҳукумат тузишнинг иложи йўқлиги сабабли Болгария президенти парламентни тарқатиб юбориш ва техник кабинетни тайинлаш тўғрисида қарор қабул қилди.
Аввалроқ Исроил бош вазири Биньямин Нетаньяху белгиланган вақт ичида ҳукумат туза олмаган эди. Агар ҳукумат тузилмаса, Исроил парламенти тарқатиб юборилади ва мамлакатда янги сайловлар ўтказишга тўғри келади, бу ҳол 2019 йил апрелидан бери беш марта кузатилган.
Изоҳ (0)