Qozog‘iston poytaxti Nur-Sultonda yashovchi maktab o‘quvchisi Rasul Jumabekov Buyuk Britaniya qirolichasi Yelizaveta II dan maktub oldi. Ushbu maktub 16 yoshli o‘smirning 2020-yil oxirida qirolichaga yozgan xatiga javob sifatida yo‘llandi, deb yozmoqda Tengrinews.
Qirolichaga xat yozish fikri Rasulda qirol oilasi haqidagi hikoyalarga bo‘lgan qiziqishdan keyin paydo bo‘lgan.
“Internetda qirolicha Yelizaveta II dan xat olgan bolaning videosini ko‘rib qoldim. Shundan keyin men ham o‘zim haqimda, qozog‘istonlik maktab o‘quvchisi ekanimni aytib, xat yozishga qaror qildim. Qozoq milliy akademiyasida balet to‘garagiga qatnashishimni, shuningdek, futbol o‘ynash va pianino chalishga qiziqishimni aytdim. Maktubda men malikaning sog‘lig‘i haqida so‘radim va unga eng yaxshi tilaklarimni bildirdim”, — dedi Rasul Jumabekov.
Rasul qirolichaga maktubni 2020-yilning oktabr oyida yuborgan va o‘zining aytishicha, javob kelishini kutmagan. Xatni yuborganidan keyin uni kuzatishning iloji bo‘lmagan va Rasul konvert yo‘qolganiga ishongan edi.
“Menga 6-yanvar kuni javob xati keldi. Qirolichaning freylinasi (lady-in-waiting) tomonidan imzolangan javob xatida qirolicha maktubimni olganidan xursand ekani yozilgan. Uning barcha ishlari yaxshi ekanini aytib, menga minnatdorchilik bildirgan. Ushbu og‘ir davrda menga va oilamga eng yaxshi tilaklarini tilagan”, — deydi Rasul.
“Hozir Rim papasi va AQSh prezidentiga yozishni rejalashtiryapman, lekin hozircha nima deb yozish haqida o‘ylayapman”, — deb qo‘shimcha qildi u.
Rasulning aytishicha, u “VKontakte” ijtimoiy tarmog‘ida mashhur insonlarning uy manzillari ko‘rsatilgan ro‘yxatga duch kelgan. Pochtada esa kassir konvert ustidagi barcha ma’lumotlarni to‘ldirib bergan va kerakli manzilga yuborgan.
Ma’lumot uchun, Namangan shahridagi 33-umumta’lim maktabida tahsil oluvchi Azizbek Mirzaxonov 2020-yilning noyabr oyida qirolicha Yelizaveta II dan maktub olgan edi. Qirolichaning xatida Azizbekning maktubi uchun minnatdorlik bildirilgan va dastxat berish mavjud qoidalarga to‘g‘ri kelmasligi sababli qirolicha va shahzoda Filippning fotosi yuborilgan.
Izoh (0)