Қозоғистон пойтахти Нур-Султонда яшовчи мактаб ўқувчиси Расул Жумабеков Буюк Британия қироличаси Елизавета II дан мактуб олди. Ушбу мактуб 16 ёшли ўсмирнинг 2020 йил охирида қироличага ёзган хатига жавоб сифатида йўлланди, деб ёзмоқда Tengrinews.
Қироличага хат ёзиш фикри Расулда қирол оиласи ҳақидаги ҳикояларга бўлган қизиқишдан кейин пайдо бўлган.
«Интернетда қиролича Елизавета II дан хат олган боланинг видеосини кўриб қолдим. Шундан кейин мен ҳам ўзим ҳақимда, қозоғистонлик мактаб ўқувчиси эканимни айтиб, хат ёзишга қарор қилдим. Қозоқ миллий академиясида балет тўгарагига қатнашишимни, шунингдек, футбол ўйнаш ва пианино чалишга қизиқишимни айтдим. Мактубда мен маликанинг соғлиғи ҳақида сўрадим ва унга энг яхши тилакларимни билдирдим», — деди Расул Жумабеков.
Расул қироличага мактубни 2020 йилнинг октябрь ойида юборган ва ўзининг айтишича, жавоб келишини кутмаган. Хатни юборганидан кейин уни кузатишнинг иложи бўлмаган ва Расул конверт йўқолганига ишонган эди.
«Менга 6 январь куни жавоб хати келди. Қироличанинг фрейлинаси (lady-in-waiting) томонидан имзоланган жавоб хатида қиролича мактубимни олганидан хурсанд экани ёзилган. Унинг барча ишлари яхши эканини айтиб, менга миннатдорчилик билдирган. Ушбу оғир даврда менга ва оиламга энг яхши тилакларини тилаган», — дейди Расул.
«Ҳозир Рим папаси ва АҚШ президентига ёзишни режалаштиряпман, лекин ҳозирча нима деб ёзиш ҳақида ўйлаяпман», — деб қўшимча қилди у.
Расулнинг айтишича, у «ВКонтакте» ижтимоий тармоғида машҳур инсонларнинг уй манзиллари кўрсатилган рўйхатга дуч келган. Почтада эса кассир конверт устидаги барча маълумотларни тўлдириб берган ва керакли манзилга юборган.
Маълумот учун, Наманган шаҳридаги 33-умумтаълим мактабида таҳсил олувчи Азизбек Мирзахонов 2020 йилнинг ноябрь ойида қиролича Елизавета II дан мактуб олган эди. Қироличанинг хатида Азизбекнинг мактуби учун миннатдорлик билдирилган ва дастхат бериш мавжуд қоидаларга тўғри келмаслиги сабабли қиролича ва шаҳзода Филиппнинг фотоси юборилган.
Изоҳ (0)