Ukraina prezidenti Vladimir Zelenskiy erkaklar uchun bola tarbiyasi ta’tilini olish huquqini beradigan qonunni imzoladi. Bu haqda davlat rahbarining matbuot xizmatiga tayanib, “RIA Novosti” xabar berdi.
Parlament tegishli qarorni aprel oyida qabul qilgan edi, u rasmiy matbuotda e’lon qilingan kundan boshlab kuchga kiradi. Hozir Ukrainada ona ishga chiqqan yoki uzoq vaqtdan buyon shifoxonada davolanayotgan bo‘lsagina, ota bola tarbiyasi ta’tiliga chiqishi mumkin.
“Davlat rahbari onalar va otalar uchun bola tarbiyasi ta’tilini olishda teng huquqlilikni ta’minlovchi qonunni imzoladi. Hujjat erkaklar va ayollar uchun ishni oilaviy majburiyatlar bilan birga olib borishda teng imkoniyatlarni ta’minlashga qaratilgan. Xususan, qonunchilikdagi otaning bola ta’tiliga bo‘lgan huquqini cheklovchi bo‘shliqlar to‘ldirilmoqda”, — deyiladi xabarda.
Oliy Rada tomonidan qabul qilingan qonun har bir ota-onaning teng huquqi sifatida bolaning onasi yoki otasiga farzandi uch yoshga to‘lgunga qadar bola tarbiyasi ta’tilini olish huquqidan foydalanish imkoniyati yaratilishini taklif qiladi.
Bundan tashqari, ish beruvchi o‘z mablag‘lari hisobiga ota-onalardan biriga oylik-maosh qisman to‘lanadigan bola tarbiyasi ta’tilini berishi mumkin.
Qonunda ta’tilning yangi turi — farzand tug‘ilgandan boshlab 14 kunlik pullik ta’til ham joriy etiladi.
Ma’lumot uchun, Qirg‘iziston prezidenti Sadir Japarov aprel oyidagi referendum natijalari bo‘yicha qabul qilingan tuzatishlarni inobatga olgan holda mamlakat konstitutsiyasining yangi tahririni imzoladi. Qirg‘iziston konstitutsiyasiga kiritilgan o‘zgartishlar hukumat rahbarining vazifalarini prezident apparati rahbariga yuklaydi. Shuningdek, Qirg‘iziston prezidenti vazirlarni tayinlash va lavozimidan ozod qilish imkoniyatiga ega bo‘ladi. Bundan tashqari, parlamentdagi deputatlar soni 120 kishidan 90 kishiga qisqartiriladi.
Shuningdek, Somali prezidenti Muhammad Abdullohiy Muhammad o‘z vakolatlarini ikki yilga uzaytirishni rad etdi. Rossiya prezidenti Vladimir Putin esa o‘ziga yana davlat rahbarligi lavozimini egallash uchun saylovlarda ishtirok etish imkonini berish nazarda tutilgan qonunni imzoladi. Endi Rossiya prezidenti lavozimini konstitutsiyadagi o‘zgarishlar kuchga kirguniga qadar egallab turgan shaxslarning ikki muddatga prezidentlikka saylanish taqiqi olib tashlandi.
Izoh (0)