Somali prezidenti o‘z vakolatlarini yana ikki yilga uzaytirishdan bosh tortdi
Somali prezidenti Muhammad Abdullohiy Muhammad o‘z vakolatlarini ikki yilga uzaytirishni rad etdi. Bu haqda prezidentning bayonnomasi matnini e’lon qilgan Radio Muqdisho’ga tayanib “RBK” xabar berdi.
“Konstitutsiyaning kafolati sifatida, men avval qabul qilingan siyosiy kelishuvni va xalq palatasi tomonidan belgilangan so‘nggi qonunni muvozanatda ushlashim kerak. Shanba kuni men Somali Federativ Respublikasining xalq palatasi oldida mamlakatdagi saylov jarayonini tiklash uchun chiqish qilaman”, — dedi Muhammad.
Saylov bo‘yicha kelishuv mamlakat prezidenti, bosh vazir, vazirlar, hududlar rahbarlari va poytaxt meri ishtirokidagi muzokoralarning natijalariga ko‘ra 2020-yilning 17-sentabrida tuzilgan. Kelishuv davlat organlarida saylov va saylovoldi kampaniyalarini o‘tkazish uchun shart-sharoitlarni belgilab beradi.
2021-yilning 12-aprel kuni Somali parlamenti mamlakatda saylovlarni ikki yildan kechiktirmagan holda o‘tkazilishini ko‘zda tutuvchi qonunni qabul qildi. Ushbu davr mobaynida amaldagi prezident Muhammadning vakolatlari ham o‘z kuchida bo‘lishi kerak. Shu bilan birga, saylovlar dastlab 2021-yilning 1-fevraligacha bo‘lib o‘tishi kerak edi.
Muxolifat amaldagi prezidentning vakolat muddatini uzaytirish to‘g‘risidagi qarorni tanqid qildi va uni qonunga zid deb atadi. Somali poytaxti Mogadishoda norozilik namoyishlari avj olib, muxolifatchilar va harbiylar o‘rtasida to‘qnashuvlar yuzaga kela boshladi. Natijada isyonchilar shaharning shimoliy kvartallarini egallashga muvaffaq bo‘ldi.
Avvalroq Suriyada birinchi marta ayol kishi prezidentlik saylovida nomzod sifatida ro‘yxatdan o‘tgani haqida xabar berildi. Damashqlik 50 yoshli ayol Faten Ali Naxar prezidentlik saylovlarida qatnashish haqida mustaqil ravishda qaror qabul qilgan. Lekin uning shaxsi haqida hech qanday batafsil ma’lumotlar keltirilmagan.
Shuningdek, Rossiya prezidenti Vladimir Putin esa o‘ziga yana davlat rahbarligi lavozimini egallash uchun saylovlarda ishtirok etish imkonini berish nazarda tutilgan qonunni imzoladi. Endi Rossiya prezidenti lavozimini konstitutsiyadagi o‘zgarishlar kuchga kirguniga qadar egallab turgan shaxslarning ikki muddatga prezidentlikka saylanish taqiqi olib tashlandi.
Ekvadorda esa “KREO harakati” o‘nglar partiyasi vakili, sobiq bankir Gilyermo Lasso prezidentlik saylovlarida g‘olib chiqqani haqida xabar berildi. Saylov byulletenlarining 98,05 foizi hisoblab chiqilganidan keyin Lasso prezidentlik saylovining ikkinchi turida 52,48 foiz ovoz to‘pladi.
