Rossiya prezidenti Vladimir Putin o‘ziga yana davlat rahbarligi lavozimini egallash uchun saylovlarda ishtirok etish imkonini berish nazarda tutilgan qonunni imzoladi. Bu haqda “Kommersant” xabar berdi.

Xabarga ko‘ra, qonun loyihasi Rossiya konstitutsiyasiga o‘zgartirishlar kiritishni quvvatlash  doirasida ishlab chiqilgan, davlat Dumasi uni 24-mart kuni uchinchi o‘qishdan keyin, federatsiya kengashi esa 31-martda tasdiqlagan.

Endi Rossiya prezidenti lavozimini konstitutsiyadagi o‘zgarishlar kuchga kirguniga qadar egallab turgan shaxslarning ikki muddatga prezidentlikka saylanish taqiqi olib tashlandi. Ya’ni, konstitutsiyadagi o‘zgarish bo‘yicha bir shaxs Rossiyada ikki martadan ortiq prezident bo‘lishi mumkin emas, biroq tuzatishlardan biriga ko‘ra, ushbu cheklov konstitutsiyadagi tuzatishlar kuchga kirguniga qadar davlat rahbari bo‘lib ishlaganlarga nisbatan qo‘llanilmaydi. Shuningdek, qonun loyihasi bilan Markaziy saylov komissiyasi raisi va deputatlarga yangi talablar joriy qilinmoqda: MSKga 30 yoshga to‘lgan, Rossiya fuqaroligiga ega shaxs rahbarlik qilishi mumkin, deputatlar esa doimiy ravishda mamlakatda yashashi shart.

Rossiyaning yangilangan konstitutsiyasi 2020-yil iyul oyida mamlakat miqyosidagi referendumdan keyin qabul qilingan. Rossiyaning asosiy qonuniga o‘zgartirishlar kiritilishi uchun referendum ishtirokchilarining 77,92 foizi, mazkur qaydlar kiritilmasligi uchun esa 21,27 foizi ovoz bergan.