Avvalroq 9-may — Xotira va qadrlash kuni munosabati bilan O‘zbekiston Mudofaa vazirligi tomonidan Toshkent shahri bo‘ylab retro avtomobillar marshi o‘tkazilishi haqida xabar berilgan edi.
Dasturlarga ko‘ra, 4—7-may kunlari Toshkent shahri ko‘chalari bo‘ylab urush davriga oid retro mashinalar marshi, aholi gavjum joylarda harbiy ansambl, harbiy orkestr jamoalarining urush yillari aks ettirilgan konsert dasturlari namoyish etildi. Retro mashinalar marshining to‘xtashi va harbiy ansambl, harbiy orkestr jamoalarining urush yillari aks ettirilgan konsert dasturlari ko‘plab tomoshabinlarning e’tiboriga tushdi.
Retro avtomobillar marshi, harbiy ansambl va orkestr ijrosidagi musiqiy dasturlar namoyishi hamda harbiy xizmatchilarning ko‘rgazmali chiqishlari 7-may kuni ham davom etdi. Marsh yo‘nalishi Tashkent City bo‘ldi. U yerda ko‘p sonli tomoshabinlarga harbiy ansambl va orkestr jamoalari tomonidan vatanparvarlik va urush yillari haqidagi qo‘shiqlarni o‘zida jamlagan konsert dasturlari namoyish etildi. Shuningdek, faxriy qorovulning ko‘rgazmali va harbiy xizmatchilarning jangovar san’atga oid chiqishlari namoyish qilindi.
“Daryo” fotomuxbiri ushbu hududda bo‘lib, marshning e’tiborga molik lahzalarini kadrlarga muhrladi.
Shu bilan 4 kunlik bayramona chiqishlar dasturiga yakun yasaldi.
Eslatib o‘tamiz, 2019-yilning oktabrida O‘zbekistonda motomavsumning yopilishiga bag‘ishlangan tadbir doirasida retro avtomobillar namoyishi bo‘lib o‘tgandi.
Izoh (0)