Samarqand shahrida ijaraga olingan uyda qimor o‘ynayotgan shaxslar ushlandi. Bu haqda Samarqand viloyati IIB matbuot xizmati xabar berdi.
Ma’lum bo‘lishicha, 25 yoshli J.F. Samarqand shahar Ro‘dakiy ko‘chasidagi uylardan birini ijaraga olib, 4 nafar shaxsga qimor o‘yini uchun sharoit yaratib bergan. 4-may kuni Samarqand shahri bo‘yicha IIO FMB 2-son IIB xodimlari tomonidan o‘tkazilgan tezkor tadbirda ushbu shaxslar qimor o‘ynayotganida hodisa joyida qo‘lga olingan.
Holat yuzasidan Samarqand shahri bo‘yicha IIO FMB huzuridagi tergov bo‘limi tomonidan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) 2-qismi bilan jinoyat ishi qo‘zg‘atilgan.
Avvalroq Samarqand viloyati Payariq tumanida 43 yoshli erkak o‘z uyida qimorxona ochgani aniqlangani, Samarqand viloyatining Past Darg‘om tumanida yashash uyida qimorxona tashkil etgan 39 yoshli erkakka nisbatan jinoyat ishi qo‘zg‘atilgani, Surxondaryoda xonadonida qimor o‘ynayotgan ota-bola va ularning sheriklari qo‘lga olingani haqida xabar berilgan edi.
Izoh (0)