«Форсаж» фильмида омон қолган ягона Ливан спорткари аукционга қўйилади

RubiX аукциони орқали ўнта Lykan HyperSport Ливан суперкарларидан бири сотувга қўйилди. Ушбу автомобиллар «Форсаж»нинг еттинчи қисми учун махсус яратилган, деб хабар беради Motor.

Сотувга қўйилган нусха — суратга олиш ишларида омон қолган ягона модель ҳисобланади. Фильм бош қаҳрамонлари Доминик Торетто ва Брайан Ўконнор ушбу суперкарда Абу-Дабидаги осмонўпар бинолар узра сакрашни амалга оширган.

Автомобиль суратга олиш жараёнида омон қолганига қарамай, унга барибир етарлича шикаст етган. Хусусан, кузови тирналган, ён ойналари синган, салонида қурилмалар панели ҳамда медиатизими йўқ. Шу билан бирга, спорткарнинг ўзига хос жиҳати ҳам бор — у 11520х6480 пикселли суратлардан иборат коллажли NFT-токенлар билан бирга сотилмоқда.

NFT-токен — бу криптовалюта токенларнинг бир кўриниши. Уларни алмаштириб бўлмайди, яъни ҳар бир нусха ноёб ва уни бошқа токенга алмаштиришнинг имкони йўқ. Токен яратувчиларининг таъкидлашича, улар томонидан яратилган арт-объект ноёб ҳисобланади, чунки бунга қадар автомобилларга бағишланган токенлар бўлмаган ва харидорларга ҳақиқий машина билан бирга сотилмаган.

Ҳақиқий Lykan HyperSport суперкарига 750 от кучи ва 960 Нм айланувчи моментга эга 3,7 литрли турбомотор ўрнатилган. Мазкур автомобилнинг нархи 3,4 миллион доллардан бошланади. Суратга олиш жараёни учун яратилган суперкарлар бироз ўзгартирилган — уларга 240 от кучига эга 2,7 литрли V6 ўрнатилган. Аукцион ташкилотчилари «Форсаж» автомобили учун 2,5 миллион доллар ишлаб олишни режалаштирмоқда.

Аввалроқ Австралияда «Форсаж» фильмида суратга тушган 50 йиллик Chevrolet аукционга қўйилгани, Пол Уокерга тегишли бўлган ўрта моторли BMW М1 суперкари сотилаётгани тўғрисида хабар берилганди.