Toshkent shahri Sergeli tumanida Isuzu avtobusi yo‘l-transport hodisasi oqibatida ag‘darildi, deya xabar qilmoqda “Toshshahartransxizmat” axborot xizmati.
Ma’lum qilinishicha, 2021-yilning 7-may kuni soat 11:15 atrofida 12-avtobus saroyi tasarrufidagi, saroy raqami 287 bo‘lgan, 130-sonli avtobus yo‘nalishida harakatlanuvchi Isuzu rusumli avtobus Nilufar 3-tor ko‘chasi bo‘ylab Nilufar chorrahasi tomon boshqarib kelinayotgan vaqtda mazkur chorrahada Matiz rusumli yengil avtomobil avtobusning chap tomoniga kelib urilgan. Natijada avtobus muvozanatni yo‘qotib, ag‘darilgan.
Dastlabki ma’lumotlarga ko‘ra, ushbu yo‘l-transport hodisasi Matiz haydovchisining yo‘l harakati qoidalarini buzishi natijasida sodir bo‘lgan.
Mazkur yo‘l-transport hodisasi oqibatida avtobusning to‘rt nafar yo‘lovchisiga tan jarohati yetgan va ular Respublika shoshilinch tez yordam ilmiy markaziga yetkazilib, tez tibbiy yordam ko‘rsatilgan.
Bundan avval Jizzaxda Nexia-2 urib yuborishi oqibatida 12 yoshli qiz vafot etgani, Asakada Labo to‘xtab turgan “GAZ-53” yuk mashinasiga borib urilgani hamda Chilonzorda Cobalt va Matiz to‘qnashib, ag‘darilib ketgani haqida xabar berilgandi.
Izoh (0)