Toshkent davlat yuridik universiteti 10-maydan masofaviy ta’limga o‘tadi. Bu haqda universitet matbuot xizmati xabar berdi.
Qayd etilishicha, respublikadagi epidemiologik vaziyatni inobatga olgan holda talabalarni asrab-avaylash, kasallikdan saqlash maqsadida universitet 14 kunga onlayn ta’limga o‘tmoqda.
Onlayn darslar distant.tsul.uz masofaviy ta’lim platformasi orqali olib boriladi.
Avvalroq Toshkent moliya instituti 6-maydan 20-maygacha, Samarqand davlat chet tillar instituti esa o‘quv yili oxirigacha masofaviy ta’limga o‘tkazilgani haqida xabar berilgan edi. Undan avval talabalar orasida koronavirus infeksiyasi aniqlangani sababli yana uchta — Toshkent davlat texnika universiteti, Samarqand shahridagi Ipak yo‘li turizm xalqaro universiteti, Andijon qishloq xo‘jaligi va agrotexnologiyalar instituti masofaviy ta’lim tizimiga o‘tkazilgandi.
Ma’lumot uchun, O‘zbekistonda 5-may kuni koronavirus infeksiyasini yuqtirib olish bilan bog‘liq 452 ta yangi holat ro‘yxatga olindi — bu kunlik kasallanish bo‘yicha 2021-yilning eng yuqori ko‘rsatkichidir.
Izoh (0)