Navoiyda uch egizak tug‘ildi. Ularga Shukrona, Shodiyona, Imona ismlari qo‘yildi

Navoiy shahar perinatal markazida uch nafar egizak qiz dunyoga keldi. Bu haqda Navoiy viloyati hokimligi matbuot xizmati xabar berdi.

Qayd etilishicha, chaqaloqlarga Shukrona, Shodiyona, Imona deb ism qo‘yildi. Shifokorlarning ta’kidlashicha, chaqaloqlar sog‘lom, ular 2,5 kilogramm, 2,4 kilogramm, 2,4 kilogramm vaznda dunyoga kelgan.

Navoiy shahar FHDYo bo‘limi mudirasi Aziza Fayziyeva chaqaloqlarga tug‘ilganlik to‘g‘risidagi guvohnomani sayyor tartibda topshirdi. Uning ma’lum qilishicha, 2021-yilning 5-may kuniga qadar Navoiy shahrida 1253 nafar bola dunyoga kelgan.

Eslatib o‘tamiz, 2020-yil oktabrida Buxoro viloyati Shofirkon tumanida 3 egizak tug‘ilgani, ularga Mirziyo, Miromon va Saida ismlari qo‘yilgani haqida xabar berilgan edi.

2019-yilning mart oyida ham ushbu tumanda yashovchi boshqa bir oilada uch egizak tug‘ilgan, ularga Prezident Shavkat Mirziyoyev sharafiga Shavkat, Miromon va Mirziyo ismlari berilgandi. 2019-yilning oktabrida Buxoro shahrida yashovchi yana bir oilada uch egizak tug‘ilgandi. Chaqaloqlarga Shavkat, Mirziyo va Saida ismlari qo‘yilgandi. O‘sha yilning sentabr oyida Farg‘onada tug‘ilgan uch egizakka Bibixonim, Amirbek va Temurbek deb ism qo‘yilgan.

Shuningdek, 2019-yilda Jizzax, Xorazm, Buxoro, Qashqadaryo viloyatlarida tug‘ilgan uch egizaklarga Shavkat, Miromon va Mirziyo ismlari Farg‘onada tug‘ilgan uch egizakka esa Shavkatjon, Ziroatxon va Saidaxon ismlari qo‘yilgan.

Ma’lumot uchun, O‘zbekistonda 2021-yilning fevral oyi holati bo‘yicha, 53 460 nafar chaqaloq tug‘ilgan. Ularning 1166 nafari egizak ekani qayd etilgan.