Rossiyaning Tomsk shahrida Migratsiya xizmati xodimi tomonidan O‘zbekiston fuqarosi kaltaklangani to‘g‘risida xabar berilgandi. Rossiya Tergov qo‘mitasining ma’lum qilishicha, mazkur holat yuzasidan jinoyat ishi qo‘zg‘atilgan.
Eslatib o‘tamiz, 2-may kuni ijtimoiy tarmoqlarda Rossiya Federal xizmati xodimi o‘zbekistonlik erkakdan haydovchilik guvohnomasini taqdim etishni so‘ragani, erkak esa uni ko‘rsatishni xohlamasligi, chunki pasportning o‘zi yetarli ekanini aytgani tasvirlangan video tarqaldi. Natijada xodim O‘zbekiston fuqarosini xonaga olib borib, boshqa mijozlari oldida kaltaklagan.
Ma’lum qilinishicha, holat yuzasidan Rossiya Jinoyat kodeksining 286-moddasi (zo‘rlik ishlatgan holda o‘z lavozimini suiiste’mol qilish yoki undan foydalanish bilan tahdid qilish) 3-qismi “a” bandi bilan jinoyat sodir etganlikda gumon qilinayotgan politsiya xodimiga nisbatan jinoyat ishi qo‘zg‘atilgan.
Dastlabki ma’lumotlarga ko‘ra, gumonlanuvchi asossiz ravishda xorij fuqarosiga jismoniy kuch ishlatib, yuziga urgan, oyog‘iga tepgan. Hozirda tergov harakatlari olib borilmoqda.
Avvalroq O‘zbekiston Tashqi mehnat migratsiyasi agentligi ushbu holatga munosabat bildirib, mamlakatning Rossiyadagi elchixonasi hamda agentlikning vakolatxonasi tomonidan Rossiyaning vakolatli idoralariga tegishli so‘rovnomalar yuborilganini ma’lum qilgandi.
Izoh (0)