Ботир Саидов Хоразм вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари — Туризм ва спорт бош бошқармаси бошлиғи этиб тайинланди. Бу ҳақда Хоразм вилояти ҳокимлиги матбуот хизмати хабар берди.
Тайинловга қадар у 2020 йил 17 декабрдан буён вилоят ҳокимининг туризм ва спортни ривожлантириш масалалари бўйича ўринбосари вазифасида ишлаб келаётган эди.
Ботир Саидов 1997 йилда Урганч давлат университети, 2006 йилда Президент ҳузуридаги Давлат ва жамият қурилиши академиясини тамомлаган.
У 2001—2020 йиллар мобайнида Марказий банк иқтисодий таҳлил департаменти иқтисодчиси, акциядорлик тижорат «Халқ банки»нинг филиалларида бошқарувчи ўринбосари, бошқарувчи биринчи ўринбосари, бошқарувчи, акциядорлик тижорат «Халқ банки»нинг Риск менежмент департаменти директори ўринбосари, «Ўзтрансгаз» АЖ бошқарув раиси маслаҳатчиси, акциядорлик тижорат «Халқ банки» ҳудудий филиаллар фаолиятини мувофиқлаштириш комплекси ҳудудий менежери, «Халқ банки» бошқарув раиси маслаҳатчиси, «Халқ банки» активлар мониторинги ва муаммоли активлар билан ишлаш комплекси раҳбари лавозимларида фаолият юритган.
Аввалроқ Хоразм вилоятининг Урганч шаҳри ҳокимига икки янги ўринбосар тайинлангани ҳақида хабар берилган эди. Ҳокимнинг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимига Нодирбек Бабажонов, ҳокимининг яна бир ўринбосари — маҳалла ва оилани қўллаб-қувватлаш бўлими бошлиғи лавозимига Қаҳрамон Кенжаев тайинланди.
Изоҳ (0)