DXX sobiq raisi Ixtiyor Abdullayev 18 yilga ozodlikdan mahrum etildi
O‘zbekiston Harbiy sudi tomonidan 27-sentabr kuni Davlat xavfsizligi xizmati (DXX)ning sobiq raisi Ixtiyor Abdullayev va u tomonidan tashkil etilgan jinoiy uyushma a’zolariga nisbatan ayblov hukmi e’lon qilindi. Bu haqda Oliy sud matbuot xizmati xabar bermoqda.
Ixtiyor Abdullayev 2019-yil fevralida Davlat xavfsizlik xizmati raisi lavozimidan ozod etilgan, bunga rasman uning sog‘lig‘i yomonlashgani, so‘nggi bir yil davomida ikki marta og‘ir operatsiyani boshdan o‘tkazgani sabab qilib ko‘rsatilgan edi. Keyinroq, 2019-yil may oyida Abdullayevning “poraxo‘rlik botqog‘i”ga botgani haqida maqolalar paydo bo‘ldi, iyunda esa Bosh prokuratura Ixtiyor Abdullayevga nisbatan jinoyat ishi ochilganini tasdiqladi. Iyul oyida esa Abdullayev ishi bo‘yicha sud boshlangan edi. O‘zbekistonning sobiq bosh prokuror Otabek Murodov ham aynan Abdullayev ishi doirasida qamoqqa olingani xabar qilingan edi.
Oliy sud axborotida ta’kidlanishicha, ikki oydan ortiq davom etgan yopiq sud majlisida sudlanuvchilarning, 300 dan ortiq jabrlanuvchi va guvohlarning ko‘rsatmalari tinglanib tahlil qilindi, dastlabki tergov organi tomonidan to‘plangan dalillarga baho berilib, sudlanuvchilarning vajlari tekshirildi.
Natijada Ixtiyor Abdullayev jinoiy uyushma tashkil etib, mansab vakolatini suiste’mol qilib, uyushgan guruh va jinoiy uyushma manfaatlarini ko‘zlab, juda ko‘p miqdorda pora olish, O‘zbekiston manfaatlariga xilof ravishda bitimlar tuzish, tovlamchilik, o‘zlashtirish yo‘li bilan talon-toroj qilish, bojxona to‘g‘risidagi qonun hujjatlarini buzish va shu kabi bir qator jinoyatlarni sodir etganlikda aybli deb topilib, jinoyatlar majmui tariqasida 18 yil muddatga ozodlikdan mahrum qilish jazosiga hukm qilingan.
Shuningdek, sud hukmi bilan DXX raisining sobiq o‘rinbosari Jahongir Egamov 16 yil, DXX raisining sobiq maslahatchisi Alisher Eshonxo‘jayev 17 yil, Toshkent shahar prokurorining sobiq o‘rinbosari Yorqin Abdullayev 14 yil, Adliya vazirligi Kadrlar bilan ishlash boshqarmasi boshlig‘i sobiq o‘rinbosari Yusufboy Xo‘jayev 8 yil, bosh prokurorning sobiq o‘rinbosari G‘ayrat Hidoyatov 5 yil, Oliy sud raisining sobiq o‘rinbosari Bahodir Dehqonov 5 yil, Namangan viloyatining sobiq prokurori Ulug‘bek Toshev 5 yil ozodlikdan mahrum qilish jazosiga sudlanib, har biri muayyan muddatga mansabdorlik va moddiy javobgarlik bilan bog‘liq lavozimlarda ishlash huquqidan mahrum qilingan.
Qolgan 15 nafar sudlanuvchiga ham sodir etilgan jinoyatlarning og‘irlilik va ijtimoiy xavflilik darajasi hamda ularning jinoyatlardagi ishtirokidan kelib chiqib, jazolar tayinlangan. Bundan tashqari, sud tomonidan jinoyatlar oqibatida davlat, shuningdek yuridik va jismoniy shaxslarning manfaatlariga yetkazilgan moddiy zararlarni qoplashga qaratilgan tegishli choralar belgilangan.
Avvalroq ushbu ish Prezident davlat xavfsizlik xizmati raisi o‘rinbosari Otabek Umarovga topshirilgani ma’lum qilingan edi.
