Yaqin kunlarda O‘zbekistonga Yevropada xavfsizlik va hamkorlik tashkiloti (YeXHT )ning Demokratik institutlar va inson huquqlari bo‘yicha byurosi (DIIHB)ning prezident saylovlariga oid ilk missiyasi keladi. Bu haqda Prezident matbuot kotibi Sherzod Asadov 3-may, dushanba kuni o‘tkazilgan brifingda so‘z yuritdi, deya xabar bermoqda “Daryo” muxbiri.
“30-aprel kuni davlatimiz rahbari Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi direktori Matteo Mekachchi boshchiligidagi delegatsiyani qabul qildi. Bu Matteo Mekachchining byuro direktori sifatidagi ilk xorijiy safarlaridan biri, Mustaqil Davlatlar Hamdo‘stligi mamlakatlariga esa birinchi tashrifi bo‘ldi.
Yana bir narsaga e’tiboringizni qaratishni istardim: oxirgi oyda hurmatli Prezidentimiz YeXHTning ikkinchi nufuzli vakili bilan uchrashmoqda. 14-aprel kuni Yevropada xavfsizlik va hamkorlik tashkilotining amaldagi raisi Ann Linde bilan uchrashuv bo‘lgan edi. Bu ham O‘zbekistondagi demokratik islohotlarga jahon hamjamiyati katta qiziqish bilan qarayotganidan dalolat.
Bundan tashqari, yaqin haftalar ichida yurtimizga Demokratik institutlar va inson huquqlari bo‘yicha byuroning saylovlarga oid dastlabki missiyasi kelishi kutilmoqda”, — dedi Asadov.
Mavzuga doir:
- Shavkat Mirziyoyev YeXHT amaldagi raisi, Shvetsiya tashqi ishlar vaziri Ann Linde boshchiligidagi delegatsiyani qabul qildi
- YXHTning O‘zbekistondagi loyihalari koordinatori o‘zgardi
- “Saylovlar bo‘yicha bizga xolisona baho kerak” — Shavkat Mirziyoyev
- Shavkat Mirziyoyev YXHT Demokratik institutlar va inson huquqlari bo‘yicha byurosi direktorini qabul qildi
Izoh (0)