“Manchester Yunayted” — “Liverpul” uchrashuvi boshlanish vaqti muxlislar noroziligi tufayli noma’lum muddatga surildi

Angliya Premyer Ligasining 34-turidan o‘rin olgan “Manchester Yunayted” — “Liverpul” uchrashuvi Manchester klubi muxlislarining norozilik namoyishi sababli noma’lum vaqtga surildi.

Sky Sports xabariga ko‘ra, Premer Liga ham “Old Trafford”dagi o‘yinning boshlanishi noma’lum muddatga qoldirilganini tasdiqlagan.

Qayd etilishicha, stadionga uchrashuvni boshqarib boradigan Maykl Oliver boshchiligidagi hakamlar yetib kelgan, ammo o‘yin qachon boshlanishini noma’lumligicha qolmoqda. Jamoalarning esa hamon mehmonxonalarni tark etmagani ta’kidlanmoqda.

“Manchester Yunayted” muxlislari klub egalari bo‘lgan Gleyzerlarning boshqaruvidan norozi va ulardan klubni sotishni talab qilmoqda.

Eslatib o‘tamiz, “Manchester Yunayted” — “Liverpul” o‘yini Toshkent vaqti bilan 20:30 ga belgilangandi.