Zangiota yuqumli kasalliklar shifoxonasida koronavirusdan davolanayotgan 101 yoshli otaxon sog‘ayib chiqdi, deb xabar bermoqda Sog‘liqni saqlash vazirligi.
Ma’lum qilinishicha, 20-aprel kuni Zangiota 2-son yuqumli kasalliklar shifoxonasiga 1920-yilda tug‘ilgan oqqo‘rg‘onlik urush va mehnat faxriysi, fuqaro F.N. og‘ir ahvolda olib kelingan.
Bemorda o‘tkazilgan PZR testi natijalari musbat chiqqan, rentgen tekshiruvlarida ikki tomonlama gidrotoraks suyuqlik aniqlangan.
Yaqinlari bilan o‘tkazilgan suhbatdan bemorda so‘nggi 4 kun davomida kasallik belgilari — yo‘tal, tana, ayniqsa, oyoq-qo‘llarning qaqshab og‘rishi, tana haroratini febril darajagacha oshishi, charchoq, holsizlik, nafas olishning qiyinlashuvi, hansirash, yurak urishining tezlashishi, ishtahasizlik belgilari kuzatilib, so‘ngi ikki kunda bu belgilar yanada kuchayib borgan.
Bemorda o‘tkazilgan PZR testi natijalari musbat chiqqan, rentgen tekshiruvlarida o‘pkaning surunkali obstruktiv bronxoektatik kasalligi, pnevmoskleroz hamda o‘ng tomonlama zotiljam aniqlangan.
Uyda bemorning ahvoli og‘irlashib borgani sababli Zangiota 2-son yuqumli kasalliklar shifoxonasiga murojaat qilgan. Qabul bo‘limida bemor MSKT tekshiruvidan o‘tkazilganda, o‘pka to‘qimasining zararlanishi bilan ikki tomonlama virus etiologiyali interstitsial zotiljam tashxisi qo‘yilib, bemordan COVID-19 infeksiyasiga ekspress-test olingan. Test natijasi unda koronavirus infeksiyasi bilan zararlanish borligini tasdiqlagan. Shundan so‘ng bemorga zudlik bilan davo choralarini ko‘rish maqsadida u bo‘limga yotqizilgan.
“Bo‘limda bemorning yoshi ulug‘ligi inobatga olinib, tezda birinchi yordam ko‘rsatilgan hamda belgilangan xalqaro standartlar bo‘yicha tekshiruv va davo muolajalari boshlab yuborilgan. Bemorning ahvoli og‘ir bo‘lishiga qaramay, bilimli, yuqori malakali hamda o‘z kasbining fidoyilari bo‘lgan shifokorlarimizning sa’y-harakatlari, o‘z vaqtida va to‘g‘ri o‘tkazilgan tekshiruv va davo muolajalari asta-sekin o‘z natijasini ko‘rsatib, otaxonning ahvoli kundan kunga yaxshilanib bordi. Davo muolajalarini mustahkamlash maqsadida bir qator tor soha mutaxassislari – infeksionist, pulmonolog, kardiolog, nevrologlar ham jalb qilindi”, — deyiladi vazirlik xabarida.
Qayd etilishicha, 101 yoshli bemor otaxon koronavirusdan butkul sog‘ayib, o‘z uyiga ruxsat berilgan. 23-mart kuni Toshkentda 99 yoshli onaxon koronavirusdan sog‘ayib chiqqandi.
Eslatib o‘tamiz, O‘zbekistonda 29-aprel kuni koronavirus infeksiyasini yuqtirib olish bilan bog‘liq 402 ta yangi holat ro‘yxatga olindi — bu kunlik kasallanish ko‘rsatkichi bo‘yicha 2021-yilning eng yuqori ko‘rsatkichidir. Shuningdek, 2 nafar koronavirusga chalingan bemor vafot etib, kasallikdan vafot etganlar soni 649 nafarni tashkil qilmoqda. Ayni paytda tibbiyot muassasalarida 3092 nafar bemor davolanyapti.
Izoh (0)