Qirg‘iziston prezidenti Sadir Japarovning 2021-yilning mart oyida Shavkat Mirziyoyevning taklifiga binoan davlat tashrifi bilan Toshkentga kelganida O‘zbekiston va Qirg‘iziston o‘rtasida bir qator hujjatlar imzolangandi. Shavkat Mirziyoyev 30-aprel kuni Sadir Japarov bilan telefon orqali muloqotda qo‘shma qaror va kelishuvlarni amalga oshirish masalalariga to‘xtalib o‘tdi.
Prezident matbuot xizmatining xabar berishicha, suhbat davomida qabul qilingan majburiyatlarni so‘zsiz bajarish va ustuvor loyihalarni ilgari surish maqsadida faol almashinuvlarni davom ettirish va hamkorlikni kengaytirish muhimligi qayd etildi.
Eslatib o‘tamiz, 2020-yilning mart oyidagi tashrif doirasida ko‘p qirrali O‘zbekiston—Qirg‘iziston sherikligining deyarli barcha yo‘nalishlarini qamrab olgan 22 ta hujjat imzolangandi. Qariyb 50 ta qo‘shma loyihani amalga oshirish nazarda tutilgan Sanoat kooperatsiyasini kengaytirish va chuqurlashtirish bo‘yicha amaliy chora-tadbirlar rejasi, O‘zbekiston—Qirg‘iziston Investitsiya fondini tashkil etish to‘g‘risidagi bitim, elektr energiyasini o‘zaro yetkazib berish, Qirg‘izistonda gidroenergetika obyektlarini qurish sohasidagi hamkorlik to‘g‘risidagi hujjatlar shular jumlasidan.
Shuningdek, ikki davlat o‘rtasida mart oyida erishilgan kelishuvlarga muvofiq, bir qator chegaraoldi uchastkalari, xususan, Ungar-Too tog‘i Qirg‘izistonga o‘tadi. Ushbu hududlar evaziga O‘zbekiston Kampirobod suv omboridan foydalanish huquqini qo‘lga kiritgan.
Izoh (0)