Samarqand shahridagi Yoshlar markazida 30-aprel kuni viloyat hokimi Erkin Turdimov ishtirokida hududdagi maktabgacha ta’lim tashkilotlari faoliyatiga bag‘ishlangan yig‘ilish bo‘lib o‘tdi. Xabar berishlaricha, unda, jumladan, viloyatdagi bolalar bog‘chalarining joriy ahvoli, tizimdagi korrupsiya holatlari muhokama qilingan.
Tanqidiy ruhda o‘tishi oldindan ma’lum bo‘lgan yig‘ilish tafsilotlarini yoritmoqchi bo‘lgan “Daryo”ning Samarqanddagi muxbiri Farhod Norbo‘tayev tadbirga qo‘yilmagan. Kirib-chiqishni nazorat qilayotgan Milliy gvardiya xodimlari “jurnalistlar ro‘yxatida yo‘qlarni kirita olmasligi”ni bildirgan. Ma’lumotlarga ko‘ra, tadbirga faqat davlat OAVlari (viloyat televideniyesi, O‘zA, “Zarafshon” gazetasi muxbirlari) qo‘yilgan.
Viloyat hokimi matbuot kotibi Manuchehr Mirzayev ham “Daryo” muxbiri bilan suhbatda ushbu tadbir viloyat Maktabgacha ta’lim boshqarmasi tomonidan tashkil etilgani, ruxsatni ham ulardan olish lozimligi, bu masalani hal qila olmasligini bildirgan. Boshqarma mas’ul xodimlari allaqachon yig‘ilish joyiga kirib ketgani, telefonlari yig‘ilish arafasida yig‘ib olingani sabab, “Daryo” muxbiri ular bilan bog‘lana olmagan.
“Tadbirda qatnashganlarning ma’lum qilishicha, yig‘ilishga kirish arafasida barcha ishtirokchilardan qo‘l telefonlari olib qo‘yilgan, hech kim ovoz yozib oladigan vosita yoki telefon bilan kiritilmagan”, — deya xabar bermoqda “Daryo” muxbiri.Yig‘ilishda ishtirok etganlarning ma’lum qilishicha, Erkinjon Turdimov bir oy muddatda viloyat Maktabgacha ta’lim boshqarmasini yaxshi mutaxassis kadrlar bilan ta’minlash bo‘yicha o‘rinbosari Xurshid Ochilovga topshiriq bergan. Yig‘ilishda viloyat Maktabgacha ta’limi boshqarmasi boshlig‘i Shuhrat Rahmonov faoliyatiga qoniqarsiz baho berilgan.
Manbalarning qo‘shimcha qilishicha, yig‘ilish bo‘layotgan vaqtda Yoshlar markazi elektr ta’minotidan vaqtincha uzilib qolgan.
Izoh (0)