O‘zbekiston poytaxtida 21-maydan 25-mayga qadar bo‘lib o‘tadigan “Toshkent Besh tashabbus harakati” tadbirlari doirasida sport musobaqalari ham o‘tkaziladi. Bu haqda tadbir tashkilotchilari “Daryo”ga ma’lum qildi.
Tadbir direksiyasining ma’lum qilishicha, harakat tadbirlarida ishtirok etish istagini bildirganlarning eng ko‘p qismi aynan sport musobaqalarini tanlagan. Xususan, Laser Run zamonaviy beshkurash qoidalari asosidagi musobaqalarda qatnashish istagini bildirganlar soni kundan-kunga ortib bormoqda.
Festival doirasida O‘zbekiston futbol assotsiatsiyasi (O‘FA) va Professional futbol ligasi (PFL) ko‘magida futbol musobaqasi o‘tkazilishi ham rejaga kiritilgan. Olimpiya tizimida o‘tkaziladigan turnirda bir qator mashhur futbolchilar mehmon bo‘lishi, professional hakamlar ishlashi kutilmoqda.
“Turnirda bosh sovrin va yutuqli o‘rinlarni qo‘lga kiritgan jamoalarga tashkilotchilarning qimmatbaho sovg‘alari taqdim etiladi”, — deyiladi “Toshkent Besh tashabbus harakati” tashkilotchilarining axborotida. Festivalda qatnashish uchun ro‘yxatdan o‘tish davom etmoqda.
Izoh (0)